MPSC chhuina report MZP-in an pawm lo

MZP Gen.Hqrs chuan thuchhuah siamin, Mizoram Public Service Commission-in hna lâkna a kalpui dan chhuitu inquiry officer-in MPSC dik lohna hmu lo mah se, MCS (Combined Competitive) Examination 2023-a MPSC thil tih dan chu dik theia an ngaih loh thu an tarlang a, "MPSC dik tak a awm theih nan ngun takin kan en zui zel dawn," an ti.

MPSC hna lâk dan chhui tura ruat inquiry officer (IO)-in thil fel lo a awm lo tia a chhui chhuak chu mak an tih thu sawiin MZP chuan, "Kan pawm thei lo. Hun rei tak MPSC enkawl tawhtu a nih avangin MPSC mualpho lohna turin thutlukna a siam ta mai em ni tih hi kan zawhna a ni," an ti a; IO report chu RTI Act tlawhchhana an dil mek thu an sawi.

MZP chuan, "Dik lo thei loa inngai MPSC hna lak dan hi hriatthiam har kan ti hle. IO-in 'Tih sual an nei lo' a tih avangin MPSC hian answer paper leh mark tabulation-ah correcting fluid duh duha hman an phal tihna a ni. Mi ṭhenkhat mark siamṭhatna initial thlap a nih laia mi ṭhenkhat mark correcting fluid hmanga tihṭhat a ni bik hi thil fair takah kan ngai thei lo. Duhsak zawngte tihtlin theihna kawngka zau tak a ni a, a him lo tak zet a ni," an ti.

MPSC chairman chhuak ta JC Ramthanga'n, "MPSC Chairman hi báng tura nawr chi a ni lo," a tih chu chhangin MZP chuan, "MPSC-a thil thleng zawng zawngah hian mawh laa báng tur a nih laia a báng ngam lo hi a hun kal tawh enin âwm kan ti hle," an ti. JC Ramthanga chu Additional Chief Secretary a nih lai November 2020-ah Covid chhuanlamin one time relaxation hmanga a makpa chu Mizoram Engineering Service-a thun tum tawhtu a nih thu an tarlang.

MZP chuan, JC Ramthanga'n chief secretary nih a duh avangin a mah aia senior zawk chief secretary ni theite nasa takin a tibuai tawh niin an sawi a, "Zirlaite hmalakna avangin minister, MLA leh mi pawimawh tak tak Mizoramah ngei pawh bàn an lo ni tawh... Hun lo la kal zel turah eng dinhmun pawimawhah mah Mizoram sorkar hian ruat nawn tawh lo se kan duh," an ti bawk.

MZP ZAWHNATE

◉ IO-in correcting fluid-a thai chhiat tawh a hmu thei leh tihsual a awm lo a tihah, tihsual awm lo hi eng vangin nge thaichhiat a nih? Mark khaikhawmna (tabulation) initial tel miah loa thaichhiat leh mark pek ṭhat nuaih hi engtianga fair nge?

◉ ACF hna lakna, exam vek tawh hnua answer paper endik loh tur tih kha IO hian a chhui tel lo em ni? Department Recruitment Rules ang ni loa exam kalpuitu MPSC hian mawhphurhna lain, exam tawh hnu answer paper endik tlang ngei se kan duh.