Chetsualnaa hliam mi pahnih an thi

H Siamliana (68) s/o Lalhriattiri (L), Champhai Zote chu nikum December thlaa lirtheiin a sutnaa a hliam tuar loin nimin zing dar 7 khan a thi.

Zote khawtlang hruaitute hnen aṭanga thu dawn danin, H Siamliana hi December 24, 2023 khan Champhai Zotlangah taxi-in a sut avangin a hliam a, Champhai District Hospital-a enkawl a nih hnuah a hliam nat deuh avangin Civil Hospital, Aizawlah enkawl leh a ni. Hun eng emaw chen hnuah in lama inenkawl turin an chhuak a, ṭha chhuak tawh loin, nimin zing khan a hliam tuar loin a thi a ni.

Thla hnih vel kal taa scooty-a chetsualnaa hliam R Lalsangzuala (21) s/o PC Vanengmawii, Dawrpui, Aizawl pawh May 7, Thawhlehni zan khan a hliam tuar loin a thi. Thu dawn danin, R Lalsangzuala hi kumin March thla khan scooty-in a chesual a, a hliam nat deuh avangin damdawi-inah enkawl zui a ni a, a hliam tuar loin May 7 zan khan a thi a ni.