KHAWTHLIR

Tanpuina hlân

Science Teachers Association Mizoram (STAM) chuan STAM Educational Foundation hnuaiah a vawi khat nan May 7, Thawhlehni khan ZMC-a MBBS third year zirlai pakhat hnenah ṭanpuina Rs 35,000 an hlân. Ṭanpuina hlanna hun hi STAM Office-ah buatsaih a ni a, STAM aiawhin adviser Dr Vanlalzara'n zirlai nu leh pate hnenah a hlan. STAM Educational Foundation hnuaiah hian pawl 11 leh a chung lam, basic science leh technical line zirlai, suma harsatna neite ṭanpuina pek theih a ni.

Dîlah tla hlum

May 7, Thawhlehni chhun dar 1 vel khan Tuimuk lui kama dilah Lalremruata (35) s/o K Lalrawngbawla (L), New Champhai a tla hlum. Thu dawn danin, Lalremruata hi a chhungte nen sangha man turin Tuimuk lui kama an leiletah an kal a, an thlám bula dilah chesualin a tla hlum a ni. A tlâk lai hmu an awm loh avangin a chetsual dan chiah hriat a ni lo.

Legal awareness

Mizoram Police chuan May 7, Thawhlehni khan Mizoram Polytechnic, Lungleiah an Legal Literacy Club sawm angin dan lam inzirtirna, legal awareness session an buatsaih. Zirhonaah hian mi 280 vel an tel a; cyber crime, ruihhlo leh naupang chungchanga dante leh traffic rules chungchanga dante an inhrilhfiah a, anti-drugs signature campaign an buatsaihah zirlai eng emaw zatin ruihhlo do tura intiam nan hming an ziak a ni.

Lungleiah training

Account & Treasuries joint director (Southern Zone) Thara Lungtau hoin nimin khan Lunglei Convention Centre-ah Lunglei district hnuaia Drawing and Disbursing Officer (DDO) leh pension file changtu dealing clerk-te tan pension leh pension hamṭhatna hrang hrang chungchang zirhona buatsaih a ni. Training-in a tum ber chu 'Ease of doing business' tih a ni.

Kawlphetha awm dawn lo

Serchhip Bukpuia 132kV Sub-Station-ah naktuk zing dar 9 aṭanga chawhnu dar 2 thleng hna thawh a nih dawn avangin Sub-Station-in a chàwm khua leh vengte'n kawlphetha an hmu thei dawn lo tih Serchhip Power Division chuan an tarlang a, mipui hriatthiamna an ngen.