Indo-Myanmar ramri chungchang ZORO-in Chief Minister an sawipui

Zo Re-Unification Organisation (ZORO) hruaitute chuan nimin khan chief minister Lalduhoma a pisaah an kawm a, India sorkarin India leh Myanmar ramri hung a tum leh Free Movement Regime (FMR) ṭhiah a tum chungchang an sawipui. CM chuan, Mizoram dep bikah ramri hung lo tur leh FMR hlîp lo turin sorkar laipui hotute a ngen tawh thu a lo hrilh.

Chief Minister chuan, "India leh Burma ramri hung a nih loh nan leh zalên taka kan inkalpawhna dan FMR hlih a nih loh nan Prime Minister, Home Minister leh sorkar laipui thuneitu hrang hrang ka sawipui tawh. Mizoram area bikah border fencing ti lo tur leh FMR hlip lo turin ka ngen tawh a, Mizoram bik chu han ngaichang phawt ila, border fencing leh FMR hlih hi an ti lo mai awm mange ka ti a ni," a ti.

ZORO hruaitute chuan, India sorkarin Indo-Myanmar ramri hung a tum leh FMR ṭhiah a tum duh loh lantir nan May 16, 2024-ah Zokhawthar leh Vaphaiah peaceful rally huaihawt an tum thu Chief Minister an hrilh a ni. CM Duhoma chuan, peaceful rally chu ṭha a tih thu leh kawng hrang hranga ṭan tlan a, kil tin aṭanga beihho a ngaih thu a sawi.

ZORO hian May 16, 2024 khian sorkar laipuiin India leh Myanmar ramri hung a tum leh FMR ṭhiah a tum duh loh lantir nan Zokhawthar leh Vaphaiah peaceful rally huaihawt an tum a, tel turin Zoram mipui an sáwm a ni.