Warehouse leh kudam ṭangkai zawka hman dan kan ngaihtuah - Horti Minister

Horticulture minister Prof. Lalnilawma chuan nimin khan Sairang leh Lengpuia sorkar department warehouse hrang hrang a tlawh a; sorkarin hmun hrang hranga warehouse leh kudam eng emaw zat a neihte chu ṭangkai zawka hman dan an ngaihtuah zel dawn thu a sawi.

Prof. Lalnilawma chuan, horticulture hi kan ram ei leh bar intodelh nana department pawimawh tak a nih thu leh ZPM policy tam zawk chu Horticulture department kuta awm a nih thu a sawi a, "Sorkar hian hmun hrang hrangah warehouse leh kudam eng emaw zat a neihte hi ṭangkai zawka hman dan kan ngaihtuah chho zel a, department dang nena ṭang kawpin thlai thar chhêk khâwl nan hman dan kan ngaihtuah zel dawn a ni," a ti.

Mizorama thing leh maute hman ṭangkai dan tur an ngaihtuah tih sawiin Lalnilawma chuan, "Kan rama maute hi ṭha tak tak a ni. Mau hmangin thil tam tak a siam theih a, meihawl mai bakah furniture ṭha tak tak, ram páwna thawn chhuah theih khawpa ṭha a siam theih," a ti a; mau sâwngbàwl lamah ṭhalaite tan káwl a êng zel dawn niin a sawi.

Adviser to Chief Minister Dr KC Lalmalsawmzauva pawhin thu sawiin, ei leh bara intodelhna turin Mizoram sorkarin theihtawp a chhuah tih a sawi a, "Mipuiah beiseina dik lo siam kan tum ve lo a, kan tih theih ngei tur chiang takin kan sawi a, hma kan la mek. Kut hnathawktute'n an thawh rim rah an seng ngei kan duh a, mipuite'n kan lakah beiseina sang tak neiin ZPM min thlang tling a, mipui tihbeidawn kan tum lo," a ti.

Warehouse leh kudam hrang hrang ennaah hian Horticulture secretary K Lalrinzuali, director CH Lalmuanpuia, additional director Lalhmingmawia Pachuau, deputy secretary Lalremruati leh thawktu dangte bakah, ZIDCO chairman Lalṭhazuala Rawite te an tel a ni.