Sorkar kal dan mipui zah lohna leh bumnaah BJP-in an ngai

BJP, Mizoram Pradesh chuan thuchhuah siamin, Mizoram mipuiin ZPM kaihhruai sorkarah kalphung thar hmuh an beisei laiin kalphung hluia tih dan an entawn leh tho niin an tarlang a, "Kalphung thar zuartute'n a hlui tih dan an entawn leh tho hi a mak kan ti a, mipui zahlohna leh bumna chiang takah kan ngai," an ti.

Mizoram BJP chuan, ZPM party kalhmang enin mipui beisei kalphung thar hmuh tur a awm lo nia sawiin, "ZPM office-a minister-te'n an thusawiah ngei party dangte'na an tih ṭhin, mipuiin ṭha lo kan tih ṭhinte sawi chhuakin, departmental work-te party mite pek chu an tih ve tho tur a nih thu an sawi ta mai hi a pawi kan ti hle," an ti a; party sorkar tho an nihzia tichiangtua an ngaih thu an tarlang.

Mizoram mipuiin MNF leh Congress an hnâwl chhan chu kalphung thar ṭha zawk an beisei vang nia sawiin BJP chuan, "Inthlan dawnah MNF leh Congress-te tih ang an tih ve loh tur thu mipui hnenah ring taka sawi chungin sorkar tawhte tih dan ang tho an tih ve duh avang hian kalphung thar hi a taka kan hmuh a rinawm ta lo hle. Mizoram mipui zah lo takin min bum a ni," an ti.