June 2002 aṭanga March 2024 inkarah Kolasib district-ah HIV vei 1,859 hmu

Kolasib District AIDS Prevention & Control Committee chu nimin khan DC Conference Hall-ah an ṭhukhawm a; June 2002 aṭanga March 2024 thlengin thisen 95,534 endik tawhah HIV vei mi 1,859 hmuh chhuah a ni tawh tih tarlan a ni.

Ṭhutkhawma Kolasib chief medical officer Dr RK Lalthlamuana tarlan danin, Kolasib district-ah June 2002 aṭanga March 2024 thleng khan HIV+ve mi 1,859 hmuh chhuah a ni tawh a, thisen endik zat 95,534 aṭangin 1.94% a ni.

Sorkar kum liam ta, April 2023 aṭanga March 2024 inkarah mi 5,578 thisen endik a ni a, chuta ṭang chuan HIV vei mi 104 hmuh chhuah a ni. HIV+ve hmuh chhuah zingah kum 25-34 an tam ber.

Meeting hi Kolasib bawrhsap John LT Sanga'n a kaihruai a; Kolasib district-a HIV darh zel tur vên dan te, HIV kai awlsam theia ngaite enkawl dan tur leh zirna-ina HIV laka invên dan inzirtirna ngawrh zawka kalpui dan tur rèl a ni.

Kolasib DC chuan, insûmtheihna leh fimkhurna hmanga hneh theih HIV/AIDS do tura ralthuam ṭha ber chu a hun taka inzirtirna ṭha inpek a nih thu a sawi a, "Zirtirna ṭha hmanga Kolasib district hneh taka tuam tur chuan sorkar, khawtlang, kohhran leh tlawmngai pawlte thawhho a pawimawh," a ti.

Mizoram State AIDS Control Society joint director (IEC) Zuiliani Hrahsel chuan, ‘Intensive HIV/AIDS awareness campaign in rural areas’ tih thupui hmangin thil pawimawhte a sawi a; Kolasib district chhung khaw hrang hrang leh zirna-ina awareness campaign kalpui dan tur te, khaw chhung hmun lûn laia inzirtirna thuziak târ dan turte a sawifiah.

District Community Resource Group din dan tur leh an hnathawh dan tur te, Adolescence Education Programme kalpui dan turte sawiho a ni bawk.