SEDP zirtirtute hun a tàwp hnai; Casual teacher turte lâk a la ni lo

MNF sorkar laia flagship programme, Socio Economic Development Programme (SEDP) hnuaia zirtirtute leh thawktu dang lâkte chu chhawr an nih hun chhung a tàwp hnai. Hetih lai hian, ZPM kaihhruai sorkar tharin casual teacher a lak tur tihfel a la ni lo.

SEDP hnuaia School Education department-a thawktu lak zinga zirtirtu ni lo (non teaching staff)-te chu ZPM kaihhruai sorkar a pian hnuah tihtawp nghal tura tih a ni a; zirtirtute chu lâk an nih hun chhung tàwp thleng thawk tura tih a ni thung. Zirtirtute chu March 31, 2024 thleng thawk tura lak an ni.

SEDP hnuaia zirtirtu leh thawktu dangte chu Mizoram sorkar chuan an thawh theih hun chhung tur pawtseiin, May 31, 2024 thleng thawk turin a ti leh a; an thawh hun pawhsei a nih tawh loh avangin May 31 thleng bak chu June 2024 aṭang chuan an thawk chhunzawm thei tawh dawn lo.

Mizoram sorkar chuan SEDP zirtirtute thlâkna tura ngaih casual teacher lâk thar a tum a, chuta tan chuan March 15, 2024 khan advertisement chhuah a ni.

Casual teacher hi high school atan mi 350, middle school atan mi 371 leh primary school atan mi 694 lak tum a ni a, an vaiin mi 1,415 an ni ang.

Casual teacher lâkna atana adver­tisement chhuah tûk, March 16, 2024-ah Lok Sabha inthlan hun puan a ni a, Model Code of Conduct puan nghal a nih avangin hmalak zui theih a ni lo.

Hetih lai hian, muster roll (MR)-a thawk zirtirtute chuan chhawr zui an nihna tur (engage­ment order) an hmuh loh hnuah May 3, 2024 khan engagement order pek an ni a; ṭum dang ang bawkin kum khat chhung atan chhawr leh an ni dawn. September 2024 hmaa Mizoram Teachers Eligibility Test (MTET) paltlang lote erawh chu chhawr zui an ni dawn lo.

Mustor roll teacher-te hi mi 861 an ni a, ni khatah Rs 570 an hlawh. An zavai hian DPAR department leh Finance depart­ment pawm­puinaa departmental promotion com­mittee kaltlanga lak an ni.