Hawi lam ka nei lo, a dik chu dik, a dik lo chu dik lo - M Lalmanzuala

Mizoram Public Service Commission (MPSC) puhnate chhui tura sorkarin inquiry officer (IO) a ruat M Lalmanzuala, IAS (Rtd) chuan, sorkarin MPSC chhui tura a tihna pahnihah MPSC-in thil tih dik loh an neih loh thu a sawi a, "Hawi lam ka nei lo, a dik chu dik, a dik lo chu dik lo ka ti tawp mai," a ti.

M Lalmanzuala hian nimin khan Aizawl Press Club-ah thuthar thehdarhtute a kâwm a; MPSC puhnate chu - 'Mizoram Civil Service Combined Competitive Examinations 2023 kalpui danah thil fel tâwk lo awm ngeiin a lang' tih leh, 'Junior Grade of Mizoram Forest Service (ACF) vide Notification No.A.12O26/2/2O23-MPSC(DR) Dt 03.07.2023 hna lak chungchangah thil fel tâwk lo awm ngeiin a lang' tihte a nih thu a sawi.

Hun rei tak MPSC enkawl tawhtu a nih avanga MPSC mualpho lohna tura thutlukna siam anga sawi awm chungchangah Lalmanzuala chuan, "Hawi lam ka nei lo, a dik chu a dik a, a dik lo chu a dik lo ka ti tawp mai a ni," a ti.

M Lalmanzuala chuan, MPSC puhna pahnih a chhuinaah mi hrang hrang thu a zawhfiahna aṭangin thil tih dan phung ni loa thil tih chu a awm a, mahse, exam result tihdanglamna leh duhsak zawng tihtlin tumna lam hawia hmalakna a hmuh loh thu a sawi.

MPSC Chairman leh member-te chu a chhuina kaihhnawihah an tel ve loh thu sawiin Lalmanzuala chuan, "Mark entute'n mark an tihfel vek hnuah anni chu interview conduct-tute an ni a, mark pek danah an tel ve lo," a ti.

MPSC chhui a nih dawnah MPSC-a thawk pathumte office-ah an lût rû nia thu darh chungchangah Lalmuanzuala chuan, mi pathumte chu a rûka lut an nih loh thu te, MPSC hotute leh police-te'n an hriatpui thute a sawi a, "Anni pathum leh police-te pawh statement ka la," a ti a; mi pathumte chuan MPSC hnuaia interview neih mai tura lehkha sem ngai an buaipui thu a sawi.