ECI-in Rasik Mohan Chakma MLA leh CEM nih kawp a remti

Election Commission of India (ECI) chuan Tuichawng bialtu MLA Rasik Mohan Chakma chu MLA leh Chakma Autonomous District Council (CADC) chief executive member (CEM) a nih kawp a remti.

RM Chakma hian ECI-in MLA leh CEM nih kawp a remtih chungchangah nimin khan Aizawl Press Club-ah thuthar thehdarhtute a kâwm a, "Dan hriat loh vangin mi dikte hmuh dik lohin an awm ṭhin. Kei chuan office of profit chungchanga dan ka hria a, min hêkna avangin rilru hrehawmna leh hlauhthawnna pakhat mah ka nei lo," a ti.

Dan a bawhchhe lo tih hre chiang mah se, hêk a nih avangin mi tam takin dan bawhchhia emaw an tih thu sawiin RM Chakma chuan, "ECI-in dan a rawn sawifiah tâkah chuan mipuiin rilru dik an put theih nan thu dik puan chhuah a ngai," a ti a, ECI thutlukna chuan mipui zirtir se a duh thu a sawi.

RM Chakma chuan, kum 2006-a Mizoram Assembly dan siam hmangin office of profit chungchangah MLA-te bàn theih angin Law & Judicial department pawhin 'dan bawhchhia, disqualify theih' angin Governor-ah an thlen nia a hriat thu a sawi a, "Tun hnuah chuan dan hi zir chiang loin observation siam tawh lo se ka duh," a ti.

Tuichawng Bialtu MLA chuan, Indian Constitution 6th Schedule hnuaia ADC-a MDC/CEM post-te chu India danpui hnuaia office of profit-in a huam loh thu sawiin, "MLA nena nih kawpin office of profit dan kan bawhchhe lo," a ti a; CEM hna a thawh avangin CEM hlawh a la thiang a, MLA a nih avangin MLA hlawh pawh a la thiang niin a sawi.

Zawhna chhangin RM Chakma chuan, "CEM leh MLA ka nih kawp hmasak ṭuma MLA aṭanga ka bàn chhan chu kan party-in ṭha zawk tura a ngaih vang a ni. Khami ṭum pawh khan a nih kawp theih tih ka chiang. Tun ṭumah chuan a nih kawp theih tih lantir ngei ka duh avangin kan hotute bulah pawh ka nih kawp a ṭul thu ka sawi," a ti.

RM Chakma ṭawiawmtu MNF MLA Robert Romawia Royte chuan, amah pawh dan hriat chian tâwk loh vangin hêk a nih tawh tih sawiin, "RM Chakma hi báng miah lo tura titu ka ni. ECI-in thiam a rawn chantir ve ta. Party-in ṭul a ti a nih chuan eng emaw zawk zawk a bànsan leh mai ang," a ti a, tun ṭumah chuan party-in MLA leh CADC CEM a nih kawp ṭul a tih thu a sawi.