ZORO peaceful rally tel turin mipui sáwm

Zo Re-unification Organisation (ZORO) hruaitute chuan nimin khan Aizawl Press Club-ah thuthar thehdarhtute an kâwm a; Indo-Myanmar ramri hung leh free movement regime (FMR) ṭhiah tumna dodal tura peaceful rally an huaihawt turah tel vek turin Mizo mipui an sáwm a, "Kan ṭanrual phawt chuan kan hlawhtling ngei ang," an ti.

ZORO general secretary L Ramdinliana Renthlei chuan, May 16, 2024-ah Zokhawthar leh Vaphai khuaah Peaceful Rally huaihawt an tum thu a sawi a, "Central sorkarin FMR tihtawp a tum leh ramri hung a tum hi a tàwp thlengin kan dodal dawn," a ti a; Mizote chu sorkar ramri khamin ṭhendarh mah se, UN Declaration on the Rights of Indigenous Peoples 2007 Article 36(1) angin an inkalpawha an inṭanpui phal a nih thu a sawi.

L Ramndinliana Renthlei chuan, UN Declaration on the Rights of Indigenous Peoples 2007 chu India sorkar pawhin a pawm thu sawiin, "Tunah erawh a kalh zawngin hmalak a tum mek. Hemi chungchang hi Nagaland Indigenous People's Forum leh ZORO chuan ZORO pisaah March 16, 2024 khan sawihoin thawhhona thuthlung kan ziak a, duh lohna lantirna atan India-Myanmar ramriah Peaceful Rally nei turin thurolum kan siam," a ti.

ZORO hotute chuan, May 16, 2024-ah Mizoram mai ni lo, Nagaland-Myanmar ramri-ah leh Manipur statea Naga luah chin leh Mizote luah chinah peaceful rally huaihawt tum a nih thu an tarlang.

ZORO TARLAN DANGTE

☑ Zo fate hi ram pathum - India, Burma leh Bangladesh-ahte kan duh vang ni loin ṭhendarh kan ni.

☑ Hnam khat ṭhen hran kan nih avangin India sorkar chuan passport ngai loin ramri aṭanga km. 16 chhunga chengte chu intlawhpawh tawn (free movement regime) a phal ṭhin a, amaherawhchu India sorkar chuan hnawk a ti a, ṭhiah tumin hma a la ṭan mek.

☑ Central sorkarin FMR tihtawp a tum leh ramri hung a tum hi Mizoram sorkar pawhin a duh lo hle a, State Assembly pawhin duh lohna resolution a lo pass tawh bakah, NGO Coordination Committee-in a dodal tawh.

☑ India sorkarin ramri hung a tum leh FMR hlih a tum hi ngawi renga tuar mai kan tum lo.

☑ Zo fate min ṭhendarh tum tute hi kan nék lêt ve dawn.