Agency-te license titawp vek tawh

Home minister K Sapdanga chuan, Mizoram páwna hna thawk tura mi tír chhuak thei tura phalna (permit) pek tawh placement agency-te chu an license tihtawp (cancel) vek a nih tawh thu a sawi.

MHIP General Headquarters hruaitute chuan nimin khan Home Minister hi a pisaah an kâwm a, Mizoram páwna Mizo ṭhalai, hna thawk tura tír chhuak ṭhin private agency-te chung­chang an sawipui a ni.

Mizoram páwna hna thawka kalte'n harsatna leh buaina an tawh ṭhin thu sawiin MHIP hruaitute chuan, dan loa Mizoram páwna hmeichhia kumtling lote tír chhuak ṭhin agency-te chu, dan anga an phû tâwka hrem an nih ngei theih nan hma la turin Home Minister an ngen.

K Sapdanga chuan hmalak mek a nih thu sawiin, "Hna thawka ram páwna ṭhalaite tír chhuak ṭhintu private agency zawng zawngte an permit cancel a ni tawh," tiin a chháng.

Tarlan tawh angin, chief minister Lalduhoma chuan April 29, 2024 khan sorkar hmasa hun laiin Aizawl DC-in private agency 27-te permit a pek thu leh an laka FIR a luh hnuah permit-te chu tihtawp lailâwk a nih thu a sawi a, "Cancel sak vek an ni dawn," a ti.