Governor-in MZU-ah zirhona a hawng

Nimin khan Mizoram University auditorium-ah 'National workshop on Artificial Intelligence based financial empowerment for Mizoram' tih buatsaih a ni a, Governor Dr Hari Babu Kambhampati, MZU chief rector ni bawkin a hawng.

Governor chuan, tunlaiah artificial intelligence ṭangkaina an hmuh thu sawiin, "Kan ni tin nunphungah awlsamna nasa takin a thlen a, a ṭha zawng leh a ṭangkai zawnga Mizoram tan hman a nih theih nana MZU leh NIT, Mizoram mithiamte hmalakna hi thil ropui tak a ni," a ti.

Mizoram tan bik AI Based Financial Technology Projects 11 kalpui mek a nih thu sawiin Larsap chuan, "Mizoram mila mipui tan chhawr ṭangkai theih chi niin ka hria," a ti a; project investigator leh co-project investigator-te thawhrimna leh remhriatnate chu mipui tan vanneihna, hnathawh leh khawsak tiawlsamtu a la ni thuai dawn niin a sawi.

Workshop hawnnaah hian MZU hnuaia project pakhat, 'Sustainable Smart Parking Solution for Aizawl City' thlirho a ni. He mobile application kaltlang hian awlsam zawkin lirthei khalhte'n lirthei hûnna tur an hmu zung zung thei dawn niin an sawi.

Hawnna inkhawm zawhah technical session neih zui a ni a, MZU-in project paruk kalpui mekte thlirho a nih bakah, sawiho leh inràwnkhawmna hun hman a ni.

Department of Science and Technology kaihhruaina hnuaiah National Mission on Interdisciplinary Cyber-Physical Systems (NM-ICPS) chuan IIT, Bhilai hnenah Technology Innovation Hub (TIH) buatsaih turin sum a pe a; IIT-Bhilai chuan financial technology huangah MZU hnenah project paruk leh NIT-Mizoram hnenah project panga kalpuina atan sum a pe a ni.