Nihna zahpui lo turin Bâwm zirlaite chah

Adviser to CM (Political) Lalmuanpuia Punte, MLA chuan nimin khan Hmawngbu khuaah Mizoram Bâwm Students' Association Conference a hmanpui a; an nihna zahpui lo turin Bâwm zirlaite a chah.

Lalmuanpuia Punte chuan, Zo hnahthlak hnam hrang hrangte chu hrang angin lang mah se, chi péng sawi danah hrang tak tak an awm lo tih sawiin, "Kan inawm pawlh vek. Mizo vek kan ni a, tu mahin kan nihna kan zahpui tur a ni lo. Keimahni ṭheuh kan inngaihhlut hian kan ropui a ni mai. Mahni zia zahpui loh tur, mahni hnam zahpui loh tur, kan zahpui chuan kan hnam a ral dawn tihna a ni," a ti.

MBSA-in Aizawlah hostel an mamawh tih a hriat thu sawiin Lalmuanpuia Punte chuan, "Ka pe ang che u ka ti thei lo a, ka theihtawp ka chhuahpui ang che u. Mizoram schedule tribe list siamṭhat tum mek a ni a, MZP-in rawtna a siam tawh zûlzuiin kan zavaia kan tel theih dan tur kan ngaihtuah ang," a ti a; Zo hnahthlak peng hrang hrangte chu inti bik awm loa an ṭanrual chuan tu mahin an ngam bik dawn loh thu a sawi.

Lalmuanpuia Punte hian Hmawngbu leh a chhehvela Bangladesh aṭanga ráltlân awmna hmun a tlawh nghal a, an dinhmun leh harsatnate a enfiah a ni.