Aizawla Urban Downhill Race buatsaih tumtute'n CM an kâwm

Aizawla Red Bull Urban Downhill Race buatsaih tumtute chuan nimin khan chief minister Lalduhoma a pisaah an hmu a, Urban Downhill Race buatsaih an tum chungchang an hrilh. CM chuan, an thil tih tum chu sorkarin a remtihsak tur thu leh a theih ang anga thawhpui an inhuam thu a sawi.

Red Bull field marketing manager Giridhar Narsaria chuan, kumin Favângah Aizawl chhuahlam mual remchangah Urban Downhill Race buatsaih an tum thu sawiin, Asia khawmualpuia a hmasa ber tur a nih thu a sawi a; buatsaih an tum dante sawiin, sorkar ṭanpuina an mamawh dan turte Chief Minister a hrilh.

Giridhar Narsaria chuan, Urban Downhill Race an buatsaih hunah a ṭul huna kawngpui ṭhenkhat lo khàr te, venhimtu leh damdawi lam duty turte lo ruahman turin sorkar an mamawh thu sawiin, sorkar tan sum sênna tur a awm dawn loh thu a sawi a ni.

Aizawlah Urban Downhill Race tih theihna hmun ṭha tam tak a awm thu sawiin Giridhar Narsaria chuan, "Hmunhma ṭha tak Mizoramin a nei hi khawvel hmuha pho chhuah a, Mizo ṭhalaite tan pawh thirsakawr khalha infiamna lamah khawvel huapa inelna lian leh ropui tak tak a awm tih hriattir te, Mizoram chu adventure sports tih nan leh khualzin tana tlawh châkawm a nihzia pho chhuahnate hi kan tum a ni," a ti a; Race thupui tur chu 'Aizawl tlang ruam' tih a nih dawn thu a sawi.

Chief Minister hi Sports minister Lalnghinglova Hmar, adviser to CM TBC Lalvenchhunga leh secretary to CM Vanlaldina Fanai ten an ṭawiawm a ni.

Red Bull aiawhte hian Urban Downhill Race buatsaih an tum chungchangah hian May 8,

Nilaini khan SYS minister Lalnghinglova Hmar chu a pisaah an kâwm tawh bawk.