Saitual DC-in khaw pahnih a tlawh

Saitual district bawrhsap Dr Lalngura Tlau chuan nimin khan an district chhunga Sihfa leh Khanpui khuate a tlawh a, Fostering Climate Resilient Upland Farming Systems (FOCUS) kaihhnawih line department aiawhte'n an ṭawiawm.

Saitual DC hi khawtlang hruaitute'n lo dawngsawngin, FOCUS hnuaia huan thlai nghet nei tura chhungkaw 15 thlante hmalaknate an thlirho. Bawrhsap chuan, FOCUS hnuaia an hmalaknaah line department-te'n theihtawp an chhuahpui zel tur thu a sawi.

Mipuite'n ram an neih danah pawh tichhe zel loa hmun nghet neih zel chu inzirtir a ngai tih sawiin Dr Lalngura chuan, "Chhungkaw tam zawk inkhai chhuah dan turte ngaihtuaha beih hram hram a, mipui income a san phah a, zirna ṭha an neih theihna atana hmalak zel dan turah ngaihtuahna sen a ngai," a ti.

FOCUS hnuaia line department lam aṭanga hmalakna hrang hrang - kawng (link road) laih, chinai thi sem, thlai chi sem, tuizem siam, terrace siam, nursery siam, vawktê, ar notê leh kel notê sem dante DC ho hian enho a ni.