AMC-in mipui ṭawiawmna an ngen

Aizawl Municipal Corporation (AMC) commissioner Lalhriatpuia chuan thuchhuah siamin, AMC-ah post awm zat (sanction post) zinga 43% chauh hnawhkhah niin, thawktu an indaih lo a, AMC-in Aizawl khawpui tana hna a thawhnaah mipui ṭawiawmna a mamawh thu a tarlang.

AMC Commissioner chuan, tun hnaiah social media leh mimal ṭhahnemngaite aṭangin AMC hmalakna atana an duhte hriat a nih thu a sawi a, "AMC chuan thawktu indaih lohna nasa tak a nei a, tunah hian sorkarin a phal zat officer leh staff post aṭanga 43% chauh hnawhkhah a ni. Heti chung hian a theih ang angin Aizawl khawpui hmasawnna leh thianghlimna kawngah chak takin hma a la a ni," a ti.

AMC-in Aizawla chengte hriselna atan vawk vulh khuahkhirhna a kalpui mek tih sawiin Lalhriatpuia chuan, "Mihring tana him lohna hmuna vawk vulh khapin, dan zâwm lote chungah hremna lekkawh turin hma a la mek. Vawk vulh chhunzawm dilna 8,731 dawn a ni a, AMC leh local council-te'n a hmunah an endik mek a, LC 85 zinga 75-ah an endik tawh," a ti a, endikna chu vawk hri African Swine Fever léng vangin chawlh lailâwk rih a nih thu a tarlang.

AMC Commissioner chuan, Aizawl mipuiin sa thianghlim zawk an ei theih nan leh thianghlimna lama ke pên zelna atan AMC-in ran talhna hmun (slaughter house) mumal tak nei turin ruhmanna a siam mek tih a sawi a, "Tunah hian hmun 12-ah ruahmanna a siam tawh," a ti.

Lalhriatpuia chuan, AMC-in chak takin Aizawl tan hna a thawh thu sawiin, "Mipui ṭawiawmna tel lo chuan hmasawn tluantling neih theih a ni lo a, AMC hnathawh kawngah lo puibàwm zel turin mipui ka ngen a ni," a ti a; ramngaw, lui, dil leh nungchate venghim leh humhalh kawnga ṭanhopuiah mipui a sáwm bawk.