ZPM sorkarah mipui an thlamuang - B Lalchhanzova

Minister of state B Lalchhanzova chuan, Lal ni tura thlan an nih loh thu leh ZPM sorkarin theihtawpin mipui hmasawnna turin hma an la a, mipui thla a muan thu a sawi.

B Lalchhanzova hian nimina a bial Aizawl East-II ZPM Zonute'n Tuma Resort-a intuaitharna an neih a hman­puinaah thu sawiin, mipui chhia leh ṭha hriatna tibuai thei zawngin an campaign duh loh thu a sawi a, "Kan tih theih tura kan ngaih thil tam tak pawh mipui hnenah kan tiam duh lo. Kan sorkar ve ta a, kan theihtawpin mipui hmasawnna tur hawiin hma kan la nghal a, ZPM sorkarah hian mipui an thlamuang tak zet a ni," a ti.

ZPM pian chhan chu ram ṭha zawk duhna vang a nih thu sawiin Lalchhanzova chuan, "Roreltu hmasate'n sem policy - NLUP leh SEDP hmangin Zoram mipui min dáwi nasa hle a, 2023 MLA inthlanah pawh sem policy an la tawktarh fan a ni," a ti a; mipui an harh tawh a ni tih an hre lo niin a sawi.

B Lalchhanzova chuan, Chief Minister-in tláwm taka mipui rawngbawl tura zirtir thu sawiin, "Mipui hian lal ni turin min thlang tling lo a, rawngbawlna hna thawk tura thlan tlin kan ni. Sorkar hmasate hun laia minister-te chawimawi vak vak ang chi te, inzawnte leh parṭhi inawrhtir vak ang chite kan duh ve lo. Ram hruaitu ropuite hi an hausakna leh an ropuina lam ai chuan mipui tana an rawngbawlna leh inpekna hian hriat reng a hlawh zawk ṭhin," a ti.

Roreltu hmasate avangin mipuiin politics an thlir dan a lo dik lo hman hle tawh tih sawiin B Lalchhanzova chuan, "ZPM a sorkar tâkah chuan kohhran mite pawhin politics chu ram rawngbawlna leh siamṭhat hna thawhna hmun ṭha tak a ni tih rinna an lo nei chho ta," a ti a; chu chu kalphung thar a nih thu a sawi.