KHAWTHLIR

Governor-in CEM atan pawm

Governor Dr Hari Babu Kambhampati chuan Lai Autonomous District Council (LADC) chief executive member (CEM) atan C Lalmuanthanga a pawm. Tarlan tawh angin, LADC-ah hun eng emaw chen sorkarna siam thei an awm loh hnuah MNF MDC 12 leh Congress party MDC pakhat chu thawkhoin, sorkarna an siam theih thu Larsap hnenah an thlen a ni. C Lalmuanthanga hi Congress party ticket-in MDC atan South Lungpher bialah thlan tlin a ni a, Congress MDC awm chhun niin, CEM turin an thlang a ni.

Mibo zawng zel

May 5, 2024 aṭanga chin hriat loha awm Lalrinhlua (28) s/o R Lalzawna, Thenzawl Hermon Veng chu Thenzawl Joint VC leh Joint YMA ruahmanna angin zawn mek zel a ni a, nimin tlai thleng khan hmuh a la ni lo. Vantawng editor Liantluanga Renthlei hnen aṭanga thu dawn danin, Lalrinhlua hi May 5 chawhnu khan Sailam Lau phaia thlám pakhatah hmuh niin, chawte an pe a, chumi hnuah hmuh zui a ni lo.

Awareness campaign

Mara Autonomous District Council Local Administration depart­ment (LAD) bultumin nimin khan MADC Golden Jubilee Hall-ah MADC executive secretary K Vanlalliana'n Cleanliness Awareness Campaign a hawng. Hawnnaah hian khaw­tlang leh tlawmngai pawl hruaitute leh sikul naupangte an tel.

Core Committee

Hnahthial District Skill Development Committee chu nimin khan additional DC Zothanmawia Khiangte hoin an ṭhukhawm a, Hnahthial district tana Skill Development Plan siam turin DC kaihhruai member pariat awmna Core Committee an din.

Joint operation

Excise & Narcotic depart­ment leh Central YMA chuan May 7, 2024 zan khan khawchhak lam aṭanga ruihhlo lut nasa lutuk vên nan khawchhak lam aṭanga lirthei kalte Seling dai, Airfield Veng ah leh Electric Veng, Aizawlahte an endik. Zankhuaa lirthei 160 chuang an endik aṭangin heroin (no. 4) hawng 4 an man a, a neitua puh nen thuneitute kutah an hlan a ni.