Sairang-Hmawngbuchhuah rêl kawng siam tumah inràwnkhawmna buatsaih; NGO-in sorkarah rawtna an theh lut dawn

NGO Coordination Committee (NGOCC) chuan nimin khan Central YMA Committee Room-ah Sairang aṭanga Hmawngbuchhuah thlenga rél kawng siam tum chungchangah inràwnkhawmna an buatsaih. An sawihote zir chian a nih hnuah sorkarah rawtna thehluh an rel.

Inrawnkhawmnaah hian NGOCC-a tel pawl - CYMA, MUP, MHIP, MZP leh MSU aiawh te, political party - BJP, MPCC, PC, ZPM leh ZNP aiawh te, Mizoram Environmental NGO Coordination Committee, Centre for Environment & Social Justice (CESJ), Mizoram Merchant Association (MIMA) leh a kaihhnawih sorkar department aiawhte leh economist-te an tel.

Páwl hrang hrang aiawhte chuan an ngaihdan leh duh dante an sawi. NGOCC chuan sawihona aṭang leh, pawl leh mimal ràwn tur âwmte an ráwn leh hnuah rél kawng chungchanga mipui ngaihdan chu Mizoram sorkarah an thehlut dawn a ni.

Sawihona kaihruaitu NGOCC chairman Lalhmachhuana, CYMA president chuan inrawn­khawmna huaihawt chhan sawiin, "Sairang aṭanga Hmawngbuchhuah inkar rél kawng chungchanga RTI Act hmanga kan zawhna CMO-in an chhan danin, sorkarin mipui ngaihdan lain, mipui ngaihdanin a kal ang tih a ni a, mipui ai awh zo tura kan ngaihte sawm an ni," a ti.

Lalhmachhuana chuan, NGOCC-in ṭum khat an ngaihtuah tawh tih sawiin, "Rél kawng hian nghawng tam tak a nei dawn a, a ṭha lo zawng leh chhe zawng a awm dawn. Kan environment leh economy lamahte nghawng nasa tak a nei ang," a ti a; inchîmralna thlenga nghawng nei tur a nih avangin ngaihtuah uluk a ṭul thu a sawi.

NGOCC Chairman chuan, Sairang-Hmawngbuchhuah rél kawng siam a nih chuan Mizoram a tan tlang dawn tih sawiin, "State dang hian hmun kilkhâwr ber thlenga rél kawng kaltir an duh kher lo. Nagaland-in Dimapur thleng an duhtâwk a, Arunachal Pradesh leh Tripura-ahte pawh thingtlang kilkhawr ber thlengin an kaltir lem lo," a ti.

Railways consultant Hrangtawna, IRTS (Rtd) chuan, rél a rawn lut ṭêp tawh chungin Mizote an inpuahchah loa a hriat thu sawiin, "Railways-in hna hrang hrang a la reng a, Mizo zingah exam tum kan awm lo," a ti a; rél lo luh hunah Mizoin hna tam zawk an thawh theih nan hnate exam ve ni se ṭha a tih thu a sawi.

Hrangtawna sawi danin, Sairang-Hmawngbuchhuah rél kawng siam tumah preliminary survey tih a ni tawh. Rél kawng chu km. 223-a thui tur a ni a, lei 110 leh leiverh (tunnel) 64, km. 98.63-a thui awm tura chhût a ni. Station 16 awmin, rêl chu darkar khata km. 100-a chaka tlân thei tura ruahman a ni bawk. Final survey tih leh a la ngai a, a siamna tur sum leh survey titu tur tihfel a ni tawh.