SASCI sawipuiah ZPM-in MNF an cho; MNF-in inhnialna chi-ah an ngai lo

ZPM Legislature Party (ZLP) secretary TBC Lalvenchhunga chuan nimin khan MNF Legislature Party (MLP) Secretary hnenah lehkha a thawn a, Scheme of Special Assistance to States for Capital Investment (SASCI) sum chungchang media hmaa sawihopuiah a sáwm. MLP erawh chuan mipui hmaa inhnialna chi-ah an ngai lo.

ZLP Secretary chuan, tun hnaiah SASCI sum lapse chungchangah thu inchuh a awm tih tarlangin, "Ràlkhat aṭanga press conference hmanga thu kan inchuh avangin mipui kan tihrilhhai hle. Chuvangin, mipuiin thil nihphung dik tak an hriat theih nan media hmaah common platform hmangin sawihona neih ṭha kan ti. Chutiang tur chuan sàwmna kan rawn thlen a ni," a ti.

An sawmna chu MLP-in an pawm hrâm an beisei thu tarlangin ZLP Secretary chuan, an pawm a nih chuan an remchan hun tur hriattir turin a ngen a ni.

Hetih lai hian MLP leader Lalchhandama Ralte chuan Vanglaini palai zawhna chhangin, thu dik tak an sawi tawh thu a sawi a, "An inenfiahna tur kan sawite mawhphurhna la ngamin en zui se. Insiamṭha se kan duh. Ram hruaitute mipui hmaa inhnial chiam chiamna chi-ah kan ngai lo. Mipui hmaa thiam chan tuma inhnial chiam hi ram hruaitute tih tur a ni lo," a ti.

Lalchhandama Ralte chuan, ZPM chuan inhnial ringawt ngaihtuah loin an thawh tur thawk zawk se an duh thu sawiin, "Sum tam tak a lapse hi hmu kir leh turin theihtawp chhuah se kan duh. Constructive opposition nih kan tum ang ngeiin a ṭul phawt chuan kan pui hreh lo," a ti a; SASCI sum an la pek chhuah lohte pawh contractor-te hnenah pe chhuak chur chur se an duh thu a sawi bawk.

MLP Leader chuan ZLP Secretary lehkha chu an party inkhawm zawha a pisa-a a kalin a hmuh chauh thu sawiin, "Kan hmuh hma daihin social media lamah a lo darh chuai chuai mai a, mak kan ti hle. Hetianga legislature party lehkha inthawn meuh social media lama tihdarh chuai chuai a nimai hi a zia lo kan ti hle. Tun hnuah thleng tawh lo se kan duh takzet," a ti.