TNT hotu Sangthankima'n Padma Shri a dawng

Thutak Nunpuitu Team (TNT) dintu Sangthankima chuan May 9, Ningani khan India rama civil mite chawimawina sang Padma Shri a dawng.

Sangthankima hian Padma Shri hi vantlang tana thawhna (social work) huangah a dawng a; chawimawina hlanna inkhawm hi Rashtrapati Bhavan-ah neih niin, President Droupadi Murmu-i'n a hlân.

Sangthankima hian November 14, 1988 khan Champhaiah TNT a din a; ruihhloin a tihbuai te, fahrah leh pianphunga rualbanlote tisa, rilru leh thlarau lama enkawlna tura din a ni. TNT chu Aizawl, Lunglei leh hmun dangahte pawh din a ni ta zel a, huang an zauh zel a ni.

Thu dawn danin, tun dinhmunah TNT-ah mi 3,535 an awm mek a; chu'ngte chu Aizawlah mi 1,810, Lungleiah mi 748, Champhaiah mi 364, Kolasib-ah mi 363 leh Tahan (Myanmar)-ah mi 250 an ni.

Sangthankima hnenah hian Vanglaini pawhin kum 2014 khan Mizo Award a lo hlan tawh bawk.