Vawk pûl hri ASF kaihhnawihah kuminah vawk 919 a thi tawh

Kuminah nimin thleng khan vawk pùl hri African Swine Fever (ASF) lênna (infected area) khua/veng 36-ah ASF kaihhnawihah vawk 919 a thi tawh. Nimin khan Serchhip district-a Khumtung leh Khawzawl district-a Tualte khuate chu ASF infected area-ah puan thar a ni.

Animal Husbandry & Veterinary department chhin­chhiah danin, January 1, 2024 aṭanga nimin thleng khan Mizoramah ASF kaihhnawihah vawk 919 a thi tawh a; chu'ngte chu ASF hri vanga thi 631 leh vawk suat 288 a ni.

January 1 aṭanga nimin thleng khan Aizawl district-a khua/veng 25-ah ASF hri vangin vawk 306 a thi tawh a, vawk 190 suat tawh niin, Mizorama vawk thi leh suat tamna ber district a ni.

Aizawl district hi kumina ASF lênna hmun infected area tamna ber a ni bawk a; infected area 25 zinga 20 chu Aizawl Municipal Corporation (AMC) huam chhunga awm a ni. AMC chhunga LC 20-ah hri vangin vawk 288 a thi tawh a, vawk 177 suat a ni tawh bawk.

Khawzawl district-a Dulte khua chu kumina ASF vanga vawk thi tamna ber khua a ni mek a, vawk 126 a thi tawh.

Hetihlai hian ASF hrilenna district zingah Lunglei leh Saitual district chu ASF hri darh zau zel tur ven nana vawk suat la awm lohna district an ni.