Aadhaar nei vek turin zirna sanga zirlaite HTE Minister leh MZU Registrar-in an chah
Higher & Technical Education (HTE) minister Dr Vanlalthlana leh Mizoram University (MZU) registrar Prof. Lalnundanga te chu nimin khan minister pisaah an inkâwm a; semester kal lai aṭangin zirlaite'n Aadhaar an neih ngei a ngaih tawh avangin Aadhaar nei vek turin zirlaite an chah.
Inkawmnaah hian India rama zirna sang enkawltu University Grants Commission (UGC) duh dante leh National Education Policy 2020 ruahman anga Mizorama college leh university kalpui dan turte an sawi dun a; HTE secretary Esther Lalruatkimi leh HTE department officer dangte pawh an tel.
UGC duh danin semester kal lai aṭangin zirlaite'n Aadhaar an neih ngei a ngai tawh dawn a, Aadhaar leh zirlaite data thlun zawm a nih loh chuan zirlaite'n result an nei thei tawh dawn lo. Zirlaite chu harsatna an tawh loh nan Aadhaar nei ngei turin an chah a ni.
NEP zulzuia National Council for Teacher Education (NCTE)-in a duan Integrated Teacher Education Programme (ITEP) chungchang an sawi a; kum 2030-ah chuan zirtirtu ni duh tan ITEP course zir ngei a ngaih tur thu an sawi. ITEP hi integrated course a ni a, undergraduate-a subject specialisation course leh teacher’s education course zir kawpna (dual major undergraduate degree) a ni.
Sorkar laipuiin SAMARTH (System for Assessment, Accreditation, and Rating of Transparency and Holistic Education), online hmanga zirna-in sangte accreditation awlsam zawka kalpui a tum chungchangah college leh university-te'n hma an lak ran a ngaih thu an sawi a; autonomous college chungchang an sawi bawk.