Project Monitoring Committee an ṭhu Airport-a hna ṭha tâwk lo ti ṭha turin an ti

Mizoram State Project Monitoring Committee chu nimin khan an chairman Lalduhoma, chief minister hoin CMO Conference Hall-ah an ṭhu a, tun hnaia hmasawnna hnathawh an endikte an thlirho. Lengpui Airport chei ṭhat mekah bitumen work a ṭhat tâwk loh avangin ti ṭha leh turin thawktute hriattir an nih thu tarlan a ni.

CM Lalduhoma chuan, Mizoram State Project Monitoring Committee member-te inpekna leh thawhrimnaah a lawm thu sawiin, an hnathawh chuan rah ṭha tak a chhuah ngei dawn thu a sawi.

Committee vice chairman R Lal Rinawma'n Committee member-te'n tun hnaia Lengpui Airport tihchangtlunna, Lengpuia Motor Sports Circuit project, Maumuala Protective Home-a brick wall boundary fencing, Hualngohmuna Solid Waste Management Centre leh Kelsiha Ropuiliani Freedom Fighter Museum siam hna thawh meka an hmuh dante a tarlang.

Committee-in an thil hmuhte leh nimina an sawi khawmna behchhanin rawtna mumal tak duan a, mawhphurtu department-ah ṭheuh thehluh ni se an ti.

R Lal Rinawma sawi danin, Lengpui Airport chei ṭhat mekah flyover bridge concrete work zawh a ni tawh a, bitumen work erawh a ṭhat tâwk loh avangin tih ṭhat leh tura tih a ni. Terminal building hluia double height awmna lai void slab la chhùn loh a ni a, a bungrua erawh lei a ni tawh a, thla thum chhunga thawh zawh ngei ni se, an ti.

Monitoring Committe chuan, Airport ceiling leh electric wiring te, canopy leh thil dang thawh tur a la awm nual a, fire safety inspection neih ngei ṭha an ti. Baggage make-up area pahnihna tur thawh mek a ni.

Airport sinage mawi leh changkang tak neih ṭul an ti a, hna dang eng emaw zat dinhmun an tarlan bakah, contractor chungchang pawh zir chian ni se an ti bawk.

PROJECT MONITORING COMMITTEE ENDIKTE

• Lengpui rama Motor Sports Circuit chungchangah, Rural Electrification Corporation CSR sum pek vbc. 7.5, SASCE sum
vbc. 8 leh state sum vbc. 2.5, a vaiin cheng vbc. 18 hmanga thawh tur niin, CCR Enterprise, Lengpuiin an thawk a, nodal department chu Mizoram State Sports Council a ni. Hmunhma laih an zo tawh a, pavement an thawk mek. Hna thawh tawh chin chu a ṭha thawkhatah an ngai.

• Maumuala hmeichhiate enkawlna in (Protective Home) chu Article 275 sum nuai 125 hmangin brick wall fencing siam hna thawh a ni a, hna a ṭhaah ngaih a ni.

• Committee-in April 25, 2024 khan SASCE sum vbc. 16.64 hmanga siam mek Solid Waste Management Centre, Hualngohmun an endik. Hna thawh nan cheng nuai 73.07 pek a ni tawh a, contractor V Lalbiakzama niin, Nodal department hi UDPA a ni. A hmunhma buatsaih hna thawk mek a ni a, uluk taka zir chian leh vil zui a ṭul niin Committee chuan a ngai.

• Ministry of Tribal Affairs sum vbc. 18 hmanga Kelsih rama Ropuiliani Freedom Fighter Museum siam mek chu uluk taka vil zui ngaiin an hria. January 19, 2021-ah work order tihchhuah niin, January 19, 2023-ah zawh tur a ni a, a hunah an zo lo. Contractor chu Rollins Engineer a ni a, nodal department chu Social Welfare & Tribal Affairs a ni.