Sorkarin infiamna lamah hand holding policy a kalpui dawn - Sports Minister

Mizoram States Sports Council (MSSC) chu an president Lalnghinglova Hmar, Sports minister hoin a pisaah an ṭhukhawm a; MSSC Non Residential Coaching Programme 2023-24 an thlir lêt. Minister chuan, Mizoram sorkarin infiamna lamah hand holding policy a kalpui dawn thu a sawi.

Lalnghinglova Hmar chuan, Mizoram sorkarin infiamnaaah hand holding policy a neih dawn thu sawiin, "Naupang sports lama ti thei zawn chhuahna tur coaching programme kalpui tum a ni. Ruahman ang chuan coach-te'n khaw pakhatah ni 15 chhung coaching an pe ang a, coach kal lam leh haw lam chu an kalna khuain an tum ang a, an hlawh chu sorkarin a tum ang," a ti.

June 13-4, 2024 chhungin Aizawlah India ram pum huap National Sports Conclave neih tum a nih thu sawiin Minister chuan, "A buatsaihna tur sorkar laipui aṭangin pawisa hmuh a ni tawh," a ti a; India rama infiamna lama mi langsarte an tel dawn thu a sawi.

Sports Minister chuan, India-in Gujarat-ah Olympic 2036 a thleng dawn tih sawiin, "Tun aṭangin kan inbuatsaih a ngai. Sorkar hmasain hma a lo lak tawh vangin sport infrastructure kan nei ṭha a, hemi chhawr thei tur hian infiammi kan neih ṭhat a ngai, chutiang tur hian coach leh trainner-te kan ṭan a ngai hle," a ti.

MSSC Non Residential Coaching Programme hi naupang, infiamnaa tuite'n pawisa chawi loa an zir theihna a ni. Kum 2023-24 chhungin infiamna chi kua - table tennis, judo, athletics, basketball, boxing, football, tennis, wrestling leh weightlifting-te kalpui a ni a; mi 430 an inzir a, mipa 322 leh hmeichhia 14 an ni.