Lungleiah Nurses Day an hmang

Trained Nurses Association of India, Lunglei District Branch chuan nimin khan Lunglei Convention Centre-ah International Nurses Day (May 12) pualin hun an hmang a; thupui chu 'Our nurses, our future, the economic power of care' tih a ni.

International Nurses Day hmannaa khuallian James Miahlung, additional DC chuan, nurse-te chu mite rawngbawlsaktu, khawtlang tana mi ṭangkai an nih thu a sawi a, "Pathian rawngbawlna pawimawh tak thawktu an nih bakah, tlawmngaihna leh dawhtheihna nen damlo an enkawl ṭhin hi a ropui hle. Missionary rilru pu chunga damlote enkawl zel turin ka chah a ni," a ti a; inzi rbelh zel tur leh mi dangte tana malsawmna ni ṭheuh turin a chah.

Nurses Day hmannah hian Lunglei Nursing School, Serkawn Nursing School, Lunglei Civil Hospital, Christian Hospital, Hope Hospital leh Faith Hospital-a nurse-te an tel a; nurse chàwl tawhte'n an hmanpui bawk.

International Nurses Day hi nurse ropui Florence Nightingale hriatreng nan a pian champha May 12-ah hman ṭhin a ni a, kuminah Pathianni a nih avangin nimin khan Lungleiah an hmang.

Nurses Day hi ram 138-in an zawm a, World Health Organisation chuan mi 1,000-ah nurse pathum zel an awm tura ngaih a nih thu a tarlang. Khawvelah nurse nuai 279 vel awm anga ngaih a ni.