Zirlaite'n zirlaibu an chan kim vek theih nan hma la turin sorkar phût

Aam Aadmi Party (AAP), Mizoram chuan, academic session 2024-25 ah thla khat chuang sikul kai a ni tawh chungin zirlaibu lei tur awm lo a la awm nual tih an sawi a; naupangte'n zirlaibu an chan kim thuai theih nan chak taka hma la turin sorkar an phût.

AAP, Mizoram hotu Andrew Lalremkima chuan nimin khan Aizawl Press Club-ah thuthar thehdarhtute a kâwm a; April thlaah sikul ṭan a nih tawh laiin tun thlengin pawl 1-8 zirlaite'n zirlaibu an la nei kim thei lo tih sawiin, "Hriatthiam harsa kan ti a, sorkar inthlahdah vang niin kan hria. Zirlaite hmakhua ngaiin sorkar hian zirlaibu an chan kim thuai theih nan hma la vat se kan duh," a ti.

Andrew Lalremkima chuan, "Tun thlenga textbook kan la nei thei lo hi zirna ṭha kan neihna tur dâltu a ni. Lehkhabu dawrte'n zirlaibu zawrh tur an nei lo a, kan nghâk ṭhup mai a ni," a ti a; subject pathum - Mizo, English leh Environmental Science-te zirlaite'n an inchan lo nasa tih a sawi.

AAP, Mizoram hruaitute chuan, zirlaibu inchan loh chhan ber chu a mawhphurtu sorkarin order an pek tam loh vang nia a lan thu sawiin, "Kuminah hian sorkar Printing Press-ah an chhu niin kan hria. Press lam chuan order kan hmuh ang chu kan chhu kim an ti a, order-tu lamin an order tlem a nih kan ring," an ti. Hun kal zel turah chuan zirlaibute chu academic session ṭan hma March thlaah zirlaite daih awm tawh se ṭha an tih thu an sawi bawk.