Modi-a a mangang - MPCC Treasurer

Mizoram Pradesh Congress Committee (MPCC) treasurer Dr Lalmalsawma Nghaka chuan, sorkar laipuiah BJP an sorkar ang ti ngam an awm tawh meuh lo nia sawiin, Narendra Modi a mangang hle niin a sawi.

Dr Lalmalsawma Nghaka hian nimina Congress Bhavan-a political session-ah thu sawiin, "Central-ah BJP an sorkar ang ti ngam an awm ta meuh lo. Tun kar chhungin stock marker a su kual nasa em em a, expert-te'n a chhan hrang hrang an sawi zingah Hung Parliament (sorkar siam thei bik awm lo) an beisei thute pawh an sawi a ni," a ti.

MPCC Treasurer chuan, "Modi-a a mangang em em a, seat 400 chuang kan la ang tia tlangau ṭhin kha tunah chuan Rahul Gandhi a bei ta ngar ngar ringawt mai. Amit Shah pawhin nasa takin Muslim mite a bei ngat ngat ta zawk a ni," a ti a; Rahul Gandhi nuihzata deusawhtute'n an fak leh tawh niin a sawi.

Mizoramah pawh Congress party an tho kâng mek nia sawiin Lalmalsawma chuan, "Nghet taka din kan mamawh. Kalphung thar kan mamawh ve tawh lo a, keini chu kalphung dika kan kal a ngai," a ti.

Dr Lalmalsawma chuan, kalphung tharah mite fak beiseiin hna an thawk a, danglam bik angin an inzuar a, mi dang fak nan chauh hna an thawk ṭhin nia sawiin, "Keini chuan mipui tihlawm tum rikngawt kalphung kan duh ve lo. Kan mipuite’n leirem an rah theih nan keini hi mi ngêlnghet leh mi rintlak kan nih phawt a ngai," a ti a; an mamawh dik tak zawng chhuakin, taima taka hna thawh an tum thu a sawi.

MPCC Treasurer chuan, Congress sorkarin mipui mamawh ang zelin rângvâ leh NLUP ṭanpuina sum an sem nia sawiin, "Tunah hian Zoram mipui mamawh ngun takin kan ngaihtuah a, hun inher danglam mil zela kan insiamrem a ngai. Policy thar, rintlak leh mipui náwlpui ban phâk kan mamawh a, Congress party chuan ngaihtuahna thar kan séng mek a ni," a ti.