Supply Minister-in hman khawp aia tam tuialhthei chheprelh lo turin mipui a ngen

Lumding leh Badarpur inkara rêl kawng chhiat vanga tuialhtheia harsatna chungchang nimin khan Food, Civil Supplies and Consumer Affairs minister B Lalchhanzova hoin a pisaah FCSCA department hotute leh a kaihhnawih mi pawimawhte'n an sawiho. Minister chuan, hman khawp aia tam chheprelh lo turin mi tin a ngen.

FCSCA Minister chuan, rel kawng chhiat vanga tuialhthei duh ang tawk hmuh theih a nih rih loh chungchangah chî-âi lo turin mipui a chah a; petrol leh diesel rawn lut tam tâwk rih lo mah se a rawn thlen reng tho avangin an hman khawp aia tam la lo tur leh chheprelh lo turin mi tin a ngen a ni.

Tuialhthei chu ualau taka dan lo (black)-a zuar an awm chu veiawm an tih thu sawi a ni a; hemi chungchanga hma la turin DC kaihhruaina hnuaiah Police leh FCSCA mi leh sate'n hmun hrang hranga petrol pump (filling station)-te endik se an ti.

B Lalchhanzova chuan, "Tuialhthei indaih lohna hi hman chawp aia tam chhêk khâwl leh black-a zuarte'n an lak khawm vanga thleng a ni a, indaih lohna siamchawp a ni," a ti a; mahni hman khawp aia tam la lo tura mipui a chah bakah, black-a zuarte chu ti tawh lo turin a chah a ni.

Supply Minister chuan, Indian Oil Corporation (IOC) hotute a biak fo thu leh Chief Minister pawhin Railways leh IOC hotute chu DO letter a thawn thu a sawi a, "Rél kawng siam tichak tur leh siam zawh a nih hmaa tuialhthei tam zawk Mizorama lak luh a nih theih nan tanker hmanga Guwahati aṭanga phurh luhsak tura ngen a ni," a ti a; a theih ang angin Mizorama tuialhthei luh dan puanzar a nih tur thu sawiin, chuta tan chuan media lamte thawhpuiah a sáwm.

FCSCA secretary Zodingpuii chuan, rél kawng chhia vanga tuialhthei lak luh chak theih loh chu IOC chauh a ni thu leh, company dang - Bharat Petroleum leh Hindustan Petroleum-te chuan harsatna an tawh phah lo a, dan pangngaiin kawngpui hmangin an phurh luh reng thu a sawi a ni.