Thuràwn pe ṭhin turin mipui ngen

MNF Political Affairs Committee member Ramthanmawia, MLA chuan, MNF party an sorkar leh ngei a rin thu sawiin, sorkar an khalh ngilna kawngah thuràwn pe zel turin mipui a ngen.

Ramthanmawia hian nimina Mizo Hnam Runa inkhawmah thu sawiin, tuna MNF MLA 10-te chu a thiam ber ber, fel leh fing berte an ni lo tih a sawi a, "Pathian leh kan ram tan mahni pawh inchhi ral raih turin kan inhuam. Eptu dinhmuna kan mawhphurhnate theihtawp chhuaha tihhlawntlin kan tum dawn a, sorkar khalh ngilna kawngah mipuite'n thuràwn min pe zel turin ka ngen a ni," a ti.

ZPM sorkarah an hotupain thu dik hlel a sawi fo avangin mipuiin thu dik an hriat theih nan MNF MLA-te'n thu dik kan puanzar a ngaih ṭhin thu sawiin Ramthanmawia chuan, "ZPM hi beih an ngai hran lo. Pawl hrang hrang kal khawm an ni a, an phawkhai a rual hran lo," a ti a; MNF sorkar leh Congress sorkarte an hun tir lam thla li/ngaah sawisel an hlawh ngai lo niin a sawi.

Ramthanmawia chuan, MNF hotute'n PAC member-a an ruat chu a beisei loh thil a nih thu sawiin, "Hruaitu thar nen bul kan ṭan ṭha dawn. Party-in kan tihsual tam tak a awm ang, kan tih fuh lohte siamṭhain theihtawpin hma kan la zel dawn a, Pathian hruaina zarah kan sorkar leh ngei ang," a ti.