KHAWTHLIR
Thisen pe
School of Nursing, Thingdawl zirlaite chuan International Nurses Day (May 12) pualin May 9, Ningani khan Kolasib District Hospital-ah thisen unit 20 an pe a, petute hmeichhia 17 leh mipa pathum an ni.
CA exam centre
The Institute of Chartered Accountant of India (ICAI) chuan Hrangbana Colllege chu exam centre atan a pawm a, May 2024 aṭangin chartered accountant (CA) exam-na atan hman ṭan niin, May leh June thla hian an exam dawn a ni. India hmarchhak bialah ICAI-in Guwahati leh Agartala-ah exam centre a nei tawh a, Hrangbana College hi a pathumna a ni.
Sangthankima an lawmpui
ZPM Ṭhalai chuan thuchhuah siamin, TNT dintu Sangthankima'n social work huangah Padma Shri a dawng chu an lawmpui thu leh an chhuan thu an tarlang a, "Rawngbawlna pawimawh tak, mi tam takin kan buaipui theih loh tur, harsatna tam tak paltlanga mi dangte tana inpumpekna hmanga Pathian kohna a chháng hi ropui kan tiin, kan chhuang tak zet. TNT rawngbawlnain Pathian malsawmna a dawn zel theih nan duhsakna sang ber kan hlan," an ti.
HSLC 2024 result
Mizoram Board of School Education chuan May 14, 2024 chhun dar 12 khian HSLC Examination 2024 result a tichhuak dawn. Result hi MBSE office, Chaltlangah leh www.mbse.edu.in leh www.mbseonline.com ahte en theih a ni ang.
DIG-in YMA kâwm
DIG (Souther Range) C Lalthanmawia chuan nimin khan a pisaah YMA Sub-Headquarters, Lunglei hruaitute an inkâwm a; zu, ruihhlo leh a kaihhnawih sual pung zel donaa police leh YMA thawhho dan tur a sawipui. DIG chuan, silai leh a mu, gelatin/detonator leh puak thei thilte chu license neite chauhin an kawl a, hmanna tur bik chauha hman theih a ni a, sumdawnna atan hman phal an nih loh thu YMA branch tina puangzar turin a ngen.
Plant Health Day
May 12 khi Interna-tional Day of Plant Health a ni a, Pathianni a nih avangin May 9, Ningani khan Central IPM Centre, Aizawl chuan 'Save plants, save planet' tih thupuia hmangin Little Kingdom School, Chhinga Vengah lemziak intihsiak an buatsaih a, Kendriya Vidyalaya, Aizawlah essay inziahsiak an buatsaih bawk.
Tourism awareness
Lunglei Salem Venga Synod Mission Centre-ah nimin khan Tourism department-in Tourism Awareness Programme an buatsaih a, Lunglei Municipal Council chief executive officer Donny Lalruatsanga'n a hmanpui. Lungleia hotel, restaurant leh homestay neitute bakah sikul zirlaite an tel a, tourist pledge an sawi rual a ni.
Technology Day
Directorate of Science & Technology chuan nimin khan Innovation Facility Centre Exhibition Hall-ah National Technology Day an hmang a, Planning (Science & Technology) secretary Lalmalsawma Pachuau-in a hmanpui. National Technology Day hi May 11-ah hman ṭhin a ni a, Inrinni a nih avangin nimin khan hman a ni. Kumina thupui chu 'From school to startups: Igniting young minds to innovate' tih a ni.
Skill Development Plan sawiho
Kolasib District Skill Committee chuan nimin khan an chairman John LT Sanga, bawrhsap hoin Kolasib District Skill Development Plan 2024-25 kalpui dan tur an sawiho. Zau zawka gas home delivery kalpui dan tur te, awmpui (housemaid) training buatsaih dan turte leh thil pawimawh dangte an ngaihtuah a ni.
Speaker tel
Assembly speaker Lalbiakzama chu nimina Guwahati-a ṭan, Commonwealth Parliamentary Association India Region Zone-III Executive Committee leh Executive Council of North East Regional Institute of Parliamentary Studies, Training & Research-ah a tel a, Mizoram Legislative Assembly official-te'n an ṭawiawm.