Chief Minister-in a pawmpui hnuah middle school 18-a zirtirtu 29 bàn

School Education department chuan Chief Minister pawmpuinain January 31, 2024 khan zirtirtu 29 an bàn a, chu'ngte chu Special Court (Prevention of Corruption Act)-in thiam loh a chantir tawhte an ni.

RTI Act tlawhchhana zawhna chhannaa a lan danin, zirtirtu 29 bànte chu educational certificate lem hmang an ni a, an appointment order pawh a lem a ni. An zavaiin Lawngtlai district chhunga sikula thawkte an ni a, January 31, 2024 khan sorkarin a bàn.

Vanglaini zawhna chhanga School Education department hotute sawi danin, middle school 18-a zirtirtu bàn tak mi 29 zinga pakhat erawh chu Special Court-in thubuai a ngaihtuah laiin a thi thung.

Sorkarin a bàn tâk zirtirtute chu Aizawl District Court-a eirûk thubuai ngaihtuahtu Special Court (Prevention of Corruption Act) chuan January 19, 2024 khan thiam loh a lo chantir tawh a, January 22-ah hremna tur a puang leh bawk.

School Education department hotute chuan, court-in thiam loh a chantir zirtirtute chu court-a thiam loh an chan avangin sorkar hna aṭangin an báng nghal tihna a ni lo tih an sawi a, "Action latu tur chu sorkar a ni a, sorkarin a duh chuan departmental proceedings kaltirin a chhui nawn ve leh thei. Bàn turin sorkarin file kaltirin a buaipui a, Chief Minister-in a pawmpui hnuah bànna thupek tihchhuah a ni," an ti.

Zirtirtu bàn an nih thu hi chief minister Lalduhoma chuan May 3, 2024-a press conference a neihnaa zawhna a chhànnaah a lo sawi tawh a, "Kan bànna chhan kha chu an appointment order hrim hrim kha fake (a lem) a ni... Appointment order lem an hmang a, an certificate pawh a lem a ni bawk. A lem fai vek a ni deuh mai... Kan bàn ta a ni," a ti.

Zirtirtu 29 bàn takte thubuai Special Court (PC Act)-in a ngaihtuaha thiam loh a chantirte rual hian Lai Autonomous District Council (LADC) chief executive member (CEM) V Zirsanga leh mi dangte pawh thiam loh chantir an ni bawk a; V Zirsanga LADC executive member i/c Education (Middle School) a nih laia thil thleng a ni.

Zirtirtute hi an thubuai ngaihtuah a nih laia jail-a an lo tàn tawh chu Court chuan a tâwkah ngaiin, hremnaah hian táng turin a ti tawh lo a; Rs 6,00,000 ṭheuh chawi tura tih an nih rualin, pawisa an chawi loh chuan kum thum chhung táng tura tih an ni thung. Zirtirtu zinga eng emaw zat chuan pawisa an chawi tawh nia thu dawn a ni.