MNF MLA-te'n SASCI sum sawiho turin Special Assembly session koh an duh

MNF Legislature Party (MLP) chuan ZPM Legislature Party (ZLP)-in SASCI sum chungchanga common platform neihpuia an sawm chungchang chu May 11, Inrinni khan an chháng a; Special Assembly session koh an duh thu an thlen.

MLP secretary R Rohmingliana chuan May 11 khan ZLP secretary TBC Lalvenchhunga chu an chenna inah an chhanna a pe. MLP chuan, SASCI sum chungchang media hmaa common platform hmanga sawihopuia sàwm an nihna May 10 tlaiah an hmuh thu tarlangin, "Kan sawiho nghal a, kan thutlukna kan rawn hriattir a che u," an ti.

Ram leh hnam tana thil/thu pawimawh leh sawiho tur awmah democracy ropuina leh legislator-te zahawmna vawn him ṭul an tih thu tarlangin MLP chuan, "Media kaltlanga common platform ni loin, Legislative Assembly House-ah ngei Special Assembly session koh ṭha kan ti," an ti a, May 2023 chhung ngeia session koh ni se an duh thu an tarlang.

MLP chuan, ZPM sorkar inthlahdah vangin SASCI sum cheng vbc. 233 chuang a lapse nia sawiin, "Hemi chungchang hi sawiho ngei ṭha kan ti. Sorkarna chelhtu in nih angin Special Assembly session koh pawh in thuneihna a ni. He thu pawimawh hi sawiho kan châk hle," an ti.

Budget session liam taah opposition bench aṭangin SASCI hnuaia sum a luan ral leh thil danga hman an hlauh avangin ṭhahnemngai takin an sawi tih sawiin MLP chuan, "Awmzia a nei ta lo kha pawi kan ti tak zet," an ti a; SASCI first instalment pawisa cheng vbc. 266 chuang sorkarin a kawl mek chu hnathawktute hnenah pe chhuak thuai turin an phût tih an tarlang.

MLP chuan, SASCI sum lapse cheng vbc. 233 chuang chu hmuh lêt leh a nih ngei theih nan hma la turin sorkar an phût thu an tarlang a; an theihna ang anga sorkar ṭanpui an inhuam reng thu an tarlang bawk.