Mizorama tuialhthei buaipuitute'n sorkar thu hriatthiam harsa an ti
Petroleum Entrepreneurs’ and Transporters’ Union of Mizoram (PETUM) chuan, sorkarin chhui chianna awm hmasa loin petrol pump neitute zawng zawng vaukhànna ni àwm tak thuchhuah a siam mai nia sawiin, hriatthiam harsa an tih thu an tarlang.
PETUM chuan May 11, 2024 khan thuchhuah siamin, "Directorate of Food, Civil Supplies & Consumer Affairs Department thuchhuahin thu hriatna rintlak leh chhui chianna awm hmasa loa petrol pump neitute zawng zawng vaukhànna ni àwm taka thuchhuah a siam mai leh trade licence cancel sak hial tura hmalak a tum hi a mak kan tiin hriatthiam har kan ti hle," an ti.
PETUM chuan, "Tuialhthei lâk luhna kawngah harsatna awm mah se a theih ang anga petrol pump neitute leh a phurtute'n mipui mamawh phuhru tura kan thawh ve mek laia thuchhuah déngkháwng tak a awm ta mai hi a mak kan ti a, FCSCA department thuchuah anga sorkar thuchhuak kalha petrol/diesel hralh an awm a nih chuan dan hmanga hmalak mai tur ni âwm tak a ni," an ti a; tun hnuah chuan chhui chianna nei hmasa loa thu déngkháwng inchhuah khum awm tawh lo se an duh thu an sawi.
Mizoramah petrol leh diesel lak luh kawngah tun hma aṭangin harsatna an tâwk fo tawh tih sawiin PETUM chuan, "Mizoramin oil depot kan neih ve loh avangin harsatna kan tâwk hma ṭhin. Oil depot neih ve ngei pawh kan nghakhlel hle a, Mizoramin a neih ve ngei theih nana sorkar hmalakna pawh beiseina sang tak nen kan thlir mek a ni," an ti bawk.