Boxing Academy dinna tur nuai 26 hmanna SYS-in MIZBA an zawtfiah

Sports & Youth Services department chuan Mizoram Boxing Association (MIZBA) hruaitute chu Boxing Academy dinna atana sum an pek tawh zinga Rs 26,00,000 an hmanna an zawtfiah a, MIZBA hian an chhang mumal thei lo nia thu dawn a ni.

Thu dawn danin, Mizoram sorkara SYS department chuan MIZBA hnenah Boxing Academy dinna leh boxing hmanraw leina atan Rs 29,00,000 a ruahman a, June 13, 2019 khan MIZBA hnenah first instalment Rs 23,20,000 (80%) pe chhuakin, August 10, 2023-ah second instalment Rs 2,80,000 chu MIZBA president C Lalṭanpuina hnenah pek chhuah leh a ni.

Boxing Academy atana sum pek chhuah tawh zawng zawng chu Rs 26,00,000 a ni a, mahse, sum pek chhuah aṭanga kum 5 a pumhlûm dawn tawhah pawh MIZBA chuan Boxing Academy a la din lo niin an sawi.

Sports department chuan May 10, 2024 khan MIZBA hruaitute chu insawifiah turin SYS Directorate-ah a ko a, MIZBA president C Lalṭanpuia leh secretary general Saithangpuia Sailo te an kal. MIZBA hruaitu hlui ṭhenkhat koh tel ni mah se, an kal lo.

MIZBA hruaitute hi SYS director Lalnunhlua, joint director C Lalremsanga leh deputy director Jenifer Chawngthu ten an kâwm a; Boxing Academy atana sum an pek tawh Rs 26,00,000 chu a kum 5-naah pawh Boxing Academy din loa an hman ralna an zawt a ni. SYS hotute zawhna hi MIZBA hruaitute'n an chháng mumal thei lo niin thu dawnna chuan a sawi.

SYS department hotute chuan MIZBA hruaitute chu May 2023 ral hma ngeia Rs 26,00,000 an hmanna utilization certificate leh voucher-te thehlut turin an hriattir a; an insawifiah zawh loh chuan MIZBA hruaitute’n an tawrh zui a ṭul tur thu an hriattir bawk.