NH-302 kawng siamah leivûng paihna mumal taka siam a awm lo - Lunglei MJA
MJA, Lunglei district member-te chuan May 9-10, 2024 khan National Highway-302, Lunglei-Tlabung kawng siam mek chu Kawrpuichhuah thlengin an enfiah a; an enfiah laiin mumal taka hna thawk hmuh tur an awm loh thu leh leivûng paihna (spoil bank) mumal tak siam a awm loh thu an tarlang.
Lunglei MJA chuan kawngpui siam an endiknaa an hmuh dan tarlangin, "Kan tlawh lai hian hnathawk mumal taka hmuh tur an awm lo. Ruah a sûr hlekin chirhdiak a tam a, chirhdiak hi lirthei awlsam zawka a kal zung zung theih nan contractor-te'n tifai zel thei se a duhawm hle," an ti.
Leivûng paihna mumal taka siam a awm lo tih tarlangin Lunglei MJA chuan, "Kawng thlangah nawr liam mai mai a tam a, awmze nei zawka leivûng paih ni se tih hi MJA duh dan a ni," an ti a; kawng laih leh siam mekah Mizo mipuite indah hrang lo leh ràlthlir mai lo a, an zavaia ta a ni tih hre thar tur leh, hnathawh dan pangngaia kawng laitute'n hna an thawk a nih chuan harsatna siam lo se an duh thu an tarlang.
Lunglei MJA chuan, "Hnathawh dan pangngai ni lo leh hmanraw ṭha lo, leivûng paih dan dik lo leh mipui namnùl zawnga hnathawh a awm a nih chuan thil ṭha zawk kan neih theih nan ṭangrual tlat ang u tih hi kan duh dan a ni," an ti a; kawng sial mek ngaihventu pawlte ṭhahnemngaihna leh kawng an vil dan chu ṭha an ti a, thâ thlah loa vil zel turin an chah.
NH-302 siam mek enfiahnaah hian MJA, Lunglei district member-te hi an president Laltlanthanga hoin mi pakua an thawk chhuak a ni.
LUNGLEI MJA TARLAN DANGTE
■ Phairuangkai lei thar dawh tur a ni a, a thar peih hmain a hlui hman rih tura tih a ni. Lei hlui hi siamṭhat phawt a nih loh chuan motor rit phur tan zawh tlak a ni lo. Lei chhuat thîr phêk phah tur phai aṭanga chah mek a ni a, a thleng har tawh hle. Lei chhuat phah tur hi company lamin a rang thei ang bera an chah thlen hi MJA chuan a duh.
■ Tuichawng lei a hluiin a chhe tawh hle. Lei thar dawh tur a ni a, a hêlna lui chunga siam chu tuilianin a lên chhe tawh a, fûrpui thlen hma ngeia siamṭhat a ṭul. Leiah hian lirthei quintal 60 aia rit kal phal loh tih a ni a, a chhuat phah thingte a nghet lo a, enkawltu nei lo ang mai a ni tawh. A structure a tuiêk nual a, chhiatna lian zawk a thlen hmaa chêt lâk a ṭul tak zet.
■ Lungsen PHC building sak zawh tak leh PGCI-in power sub-station an siam mek enfiah nghal a ni. Mipuite'n ṭangkai zawka an hman theih nan rintlak leh tlo, ro tling ngeia chhuah turin hnathawktu kan ngen.