Sangha notê ṭha lo zuar lo turin ngen

Serchhip District Fish Farmers Association (SDFFA) chuan thuchhuah siamin, an district chhungah sangha khawi tur a notê ṭha lo zuar lo turin sangha note zuartute an ngen.

SDFFA chuan, fûr a inṭan dawn a, sangha no zuar an awm leh ṭan dawn tih tarlangin, "Serchhip district chhungah sangha chi ṭha lo tu ma'n rawn zuar lo turin kan inngen. Sangha chi ṭha lo hi sangha dil neite'n kumtluana an thawh rimna holam taka chantir theihna a ni," an ti.

Sangha no ṭha lo zuar/supply hriate chu SDFFA hruaitute emaw, phone number 9436376265-ah emaw hriattir turin an ngen a ni.

SDFFA chuan, Mizoram sorkarin subsidy-in sangha notê sem chhuah leh a tum mek tih tarlangin, "Serchhip district bikah chuan Indian major carb kan ṭhatpui lo nia kan hriat avangin common carp leh grass carp chauh sem a nih theih nan thuneitute hnenah ngen ni se," an ti.