Tuialhthei khuahkhirhna hlih a ni

Food, Civil Supplies and Consumer Affairs department chuan thuchhuah siamin, Badarpur leh Lumding inkara rél kawng chhia chu siamṭhat a nih tawh avangin May 11, Inrinni khan Mizorama tuialhthei khuahkhirhna zawng zawng hlih a ni tih an tarlang.

FCSCA department chuan, "Rél kawng chhiat vanga Mizorama POL (petrol & diesel) lak luh kawnga harsatna tawh mek chungchangah, rél kawng siamṭhat tawh a ni tih mipui hriat turin puanzar a ni... Rêl kawng a lo ṭhat tâkah chuan POL hi dan pangngai angin tluang takin chatlak loin lak luh chhunzawm theih a ni tawh ang," an ti.

Supply department-in Indian Oil Corporation-in ruahmanna an siam dan a tarlan dan chuan, Mizoram aiin Tripura-in tuialhtheiah harsatna an tawh nasat zawk avangin rélin POL a phurh hmasak pahnih chu Tripura tan zuah phawt a ni dawn a, rélin a phurh vawi thumna chu Mizoram tan pek a ni ang.

FCSCA department chuan, "POL-a Mizoramin harsatna kan tawh mek chu ziaawm chho zel tura ngaih a ni a, mipuite chî-âi lo turin kan ngenin kan hriattir a ni," an ti.

Hetih lai hian, Mizoram sorkarin dan lo (black)-a tuialhthei zawrh phal lohna khauh zawka a kenkawh avangin nimin lamah chuan MIZOFED Filling Station bula petrol zuar ṭhinte inzuar hmuh tur an awm lo a ni.