Assamese-te'n Rongali Bihu an lâwm; Assam CM nen ramri-ah harsatna siam lo zawnga awm kan remti - CM

Assam Cultural Society, Mizoram chuan May 11, Inrinni khan Vanapa Hall-ah Rongali Bihu (Assamese kum thar) an lawm a, chief minister Lalduhoma'n hmanpuiin, Assam Chief Minister nen an inkawmnaah, Mizoram leh Assam ramri-ah boruak rálmuang awmtir a, harsatna siam lo zawnga awm an remtih dun thu a sawi.

CM Lalduhoma chuan, Mizoram leh Assam chu ram inṭhenawm an nih avangin kawng tinrêngah inmamawh tawn, ṭangho tur an nih thu a sawi a, "Inrem taka hmasawnna rahbi kan rah chhoh tlan zel a ṭul. Kumin tìr lama Assam CM Pu Himanta Biswa Sharma nena kan inkawmnaah pawh ramria boruak rálmuang awmtir leh harsatna siam lo zawng zela awm kan remti dun a ni," a ti.

Assamese eng emaw zat Mizoramah an awm mek tih sawiin Lalduh­oma chuan, "In hun rem­changahte fang kual u la, kan nunphung leh hmun hluite tlawh u la, inunau­na leh inhriatpawh tawnna ṭha i siam zel ang u," a ti a; Mizoramah thla­muang leh hlim taka an awm an beisei thu a sawi.

Chief Minister chuan, hnam tinin ṭobul an nei a, hnam nun leh tih dan phung ṭha tak tak an nei tih sawiin, "Pi leh pute aṭanga tih dan ṭha leh hnam nun ze mawi tak takte chhawn nun zel hi a mawi a, ṭhangtharte mawh­phurhna pawimawh a ni," a ti a; Assam Cultural Society chu Mizoramah an hnam zia vawnghim zel turin a chah. CM hian Rongali Bihu souvenir a tlangzarh a ni.

Assam Cultural Society, Mizoram presi­dent Dr PC Kalita chuan, Mizoramah Assamese mi 500 vel an chêng mek tih sawiin, "Nuam kan ti hle. Chief Minister-in min rawn telpui thei hi kan lawm em em a ni," a ti.

Rongali Bihu lawm­naah hian Bihu làm leh zai te, Assamese hnam ze pholang thei thilte entir a ni a, Nepali làm leh Cheraw entir a ni bawk.