Lok Adalat-ah thubuai 298 chingfel

May 11, Inrinni khan Mizorama district hrang hrangah National Lok Adalat buatsaih a ni a, thubuai ngaihtuah tura lut 904 zinga 298 chinfel a ni.

Thu dawn danin, samkhai zawk leh sum sên ngai loa thubuai chinfelna, Lok Adalat hi Mizoram State Legal Services Authority kaihhruainain Mizorama district pariata district court-ahte leh Gauhati High Court, Aizawl Bench-ahte buatsaih a ni.

Mizoram pumah thubuai ngaihtuah tur 904 a lut a, chu'ng zinga 298 chu chinfel a ni. Thubuaite chu - mimal pawisa inpûktira inrûl leh thei lo thubuai te, bank loan rûl ṭha thei lo thubuaite leh civil case hrang hrang a ni. Thubuai chinfel tak 298-in a kaihhnawih sum chu Rs 5,09,62,226 a tling.

Lok Adalat-ah hian thubuai - criminal compoundable case-te leh civil case chi hrang hrang ngaihtuah ṭhin a ni a; lung-in intàntir zawnga kalpui a ni ve lo.