Minister-te'n kawng siam mek enfiah

May 11, Inrinni zing khan Vaivakawn Zohnuai leimin vanga kawng bal siamṭhat hna thawh mek chu PWD minister Vanlalhlana leh bialtu MLA Lalnghinglova Hmar, minister of state-te'n an enfiah.

PWD Minister chuan, kawng siam mek chu bialtu MLA-in a vei tak zet tih sawiin, "He lai kawng hi kawng pawimawh tak a nih avangin sorkar pawhin a ngai pawimawh a, ṭha taka siam ngei a tum," a ti a; hna thawktute chu ṭha taka thawk tur leh hun tiam chhunga zo ngei turin a chah.

Lalnghinglova Hmar chuan, Vaivakawn Zohnuaia lemin vanga kawng tlabal thawm ṭhat mek chu fûrpui thlen hma ngeia a rang thei ang bera hmalak a ṭul thu a sawi a, "Leimin vanga harsatna dang a thlen tawh lohna turin tui luankawr ṭha tâwk tak a rang thei ang bera siam a ṭul," a ti.

NH-06 leh Vaivakawn Zohnuai-MZU inkar (Nutumi Road), Vaivakawn thlànmual aṭanga Hunthar Veng tlang tura kawng siam theih an beisei thu pawh Aizawl West-II MLA chuan a sawi.

Vaivakawn veng pa W Chhuanawma, deputy chief whip chuan, Vaivakawn chu Aizawl tlaklam mipui leh sumdawngte tan hmun pawimawh a nih thu sawiin, "Vaivakawn thlan­mual aṭanga Hunthar Veng tlanga kawng sial a nih chuan mipui leh motor veivâk tan awlsamna a thlen dawn," a ti.

PWD engineer-te chuan Vaivakawn Zo­hnuaia kawng siam mek chu June 2024-ah zawh hman a nih dawn thu leh zawh hunah cement châr chhung nghah deuh erawh a ngaih tur thu an sawi.

Minister-te hi PWD hotute leh Vaivakawn khawtlang hruaitute'n an ṭawiawm a, Vaivakawn thlan­mual aṭanga Hunthar Veng tlang tura kawng sial tlang theih dan tur an sawiho nghal a ni.