KHAWTHLIR

KTP-in thisen pe

May 11, Inrinni khan KṬP, Venghlui Branch chuan an din champha pualin an kohhran hall-ah ZMC tan thisen unit 60 an pe a, petute mipa 47 leh hmeichhia 13 an ni. KṬP, Republic Veng Branch pawhin an diamond jubilee pualin an kohhran hall-ah Synod Hospital tan thisen unit 68 an pe a, petute mipa 55 leh hmeichhia 13 an ni.

EYMA Career Fair

YMA, Electric Veng Branch, Aizawl hnuaia Literature & Education Sub-Committee chuan May 11, Inrinni khan an YMA Hall-ah 'Career Fair' an buatsaih a, an branch YMA president C Lalrokhuma'n a hawng. Fair-ah hian arts, science, commerce, management, law, military/force, medical, engineering leh entrepreneuship lama tui mite tana kawng kawhhmuhna turin stall buatsaih a ni.

Lui thian fai

Phawngpui Photographers Association, Lawngtlai chuan May 11, Inrinni khan Lawngtlai khawpui châwmtu tui lâkna Chhimtuipui luia Chawngpawng li leh a chhehvela bawlhhlawhte an chhar fai a, a paihna tur hmunah an paih nghal. Hnatlangah hian mi 30 vel an thawk chhuak a ni.

ATM booth hawng

AMC Ward XVI corporator R Lalawmpuii ward fund hmanga siam, Bethlehem Vengthlang chuanhnuai kâwna Apex Bank ATM booth thar chu May 11, Inrinni khan Mizoram sorkara secretary H Lianzela'n a hawng. ATM booth hi October 6, 2023-ah sak ṭan a ni a, a sakna atan Corporator ward fund Rs 3,50,000 hman a ni.

Mibo damin hmu

May 4, 2024 aṭanga bo Lalrinhlua (28) s/o R Lalzana, Thenzawl Hermon Veng chu May 11, Inrinni khan Thenzawl aṭanga km. 7 vela hlá Chhiarchhuak lui hnar, Thenzawl ramah hmuh a ni. Lalrinhlua hi rilru lama mi phâk chiah lo a ni a; khawtlangin ni sarih an zawnna ní-ah thlámah hmuh a ni. Bialtu MLA Lalduhoma, chief minister tirhin mibo zawnnaah hian minister of state B Lalchhanzova a kal a, hnatlang thingpui inna atan Rs 5,000 leh mibo chhungte hnenah Rs 5,000 a pe a ni.