Hmun hrang hrangah walkathon buatsaih

Fit India Movement hmalakna kalzelah Inrinni zing khan NSS volunteer-te pualin district hrang hrangah walkathon buatsaih a ni a, Aizawlah chuan Vanapa Hall kawt aṭangin Sports & Youth Services minister Robert Romawia'n a vai liam.

Walkathon Flag Off Programme hi State NSS officer Dr Zirlianngura'n kaihruaiin, Robert Romawia chuan Fit India Movement pawimawhna sawiin, "He programme tihhlawhtlinna atana NSS volunteer-te'n walkathon an nei hi a lawmawm takzet," a ti.

Walkathon-ah hian college leh higher secondary school 13 aṭangin NSS volunteer-te an tel a, Chanmari kawn thleng an kal a ni. Kolasibah chuan Govt. Kolasib College bultumin walkathon hi buatsaih a ni a, Diakkawn aṭangin minister of state K Lalrinliana'n a vai liam. K Lalrinliana chuan tunlai natna tam tak chu kan khawsak phungin a zir loh vang a thleng a nih thu sawiin, "Taksa insawizawi tam tur leh infiamna hrang hranga tel ṭhin tura hunawl insiam a pawimawh," a ti.