KHAWTHLIR

Hrangbana College NSS chuan nimin khan Aizawl Civil Hospital tan thisen an pe leh a, mipa 37 leh hmeichhia 12-te'n thisen unit 49 an pe. HBC NSS hian kuminah graduation grand dinner an neih theih loh avangin chumi aiah chuan blood donation an huaihawt a, Thawhlehni khan unit 29 an pe tawh a ni. Nimin vêk khan Champhaia Catholic Ṭhalai Pawl chuan District Hospital-ah thisen unit 36 an pe a, petute mipa 30 leh hmeichhia paruk an ni.

MNF MLA 12-te'n Assembly Speaker hnena MLA aṭanga bàn tura ngenna an thehluh avanga Speaker-in insawifiah tura a hriattir angin, ZPM Legislature Party leader Lalduhoma chuan vawiin hian insawifiahna a thehlut dawn. Lalduhoma hi insawifiahna atan ni 14 chhung hun pek a ni a, vawiin hi a ni 14-na a ni.

Lalhruaitluanga s/o Lalṭanpuia, Luangmual, Aizawl leh Lalhminghlua s/o Lalrinkima, Ramhlun South-te chu British Royal Air Force Regiment Gunner-ah an tling a, Mizo zinga tling hmasa ber an ni.

Nimin khan Aizawl DEO conference hall-ah Aizawl district-a Agriculture field staff-te tan Training on Management of Pest & Diseases buatsaih a ni a, DAO Lalsanglura Sailo-in a kaihruai. Thlai enkawl dan leh natna laka vên dante zirho a ni.

MNF party chuan thuchhuah siamin, MLA Lalduhoma bàn tura MNF MLA-te hmalakna chungchangah, social media lamah thu dik lo tak tak thehdarhte chhui zui tura ngenna Mizoram police-te'n rang taka bawhzui a, an chhui chhuak nghal chu lawmawm an tih thu an tarlang a, "Mipui hriatah thu dik an rawn tarlan thuai tak avangin lawmawm kan ti hle," an ti.

Assembly Speaker, Deputy Speaker leh MLA 11-te chuan September hlawh aṭangin Covid-19 dona atan nimin khan Chief Minister Relief Fund-ah pawisa an thawh. Speaker leh Dy. Speaker hian an hlawhpui (basic pay) aṭangin 40% an thawh a, MLA dangte'n 30% an thawh thung.