Lalduhoma kan huat vang a ni lo Dan kan ngaih pawimawh vang - MNF MLA

MNF Legislature Party (MLP) secretary L Thangmawia chuan, thil lungchhiatthlak pahnih a awm thu sawiin, "Pakhatnaah chuan dan bawhchhiatna vanga tiang thil awm hi a ni. Mimal inhaw zui loin danin ro a rél mai turah kan ngai. Insawifiah pawh ngai miah lo tura kan ngaih laiin, dan dik taka kengkawh duhtute beih kan tâwk zawk lek lek a, chu chu lungchhiatthlak dang leh chu a ni. Mipui hriatah thil awmzia sawi ve a ngai ta a ni," a ti a; Duhoma chungchangah danin ro a rél mai tura an ngaih thu a sawi.

L Thangmawia chuan, an thil tih chu movement leh ṭangrual pawla an ngaihte'n party an din vanga thleng a nih thu sawiin, "Party an nih tâkah chuan Pu Lalduhoma chêt dan chu dan kalh a nih thu kan dawng. Speaker pawh an hrilh a, Zo Peoples' Movement MLA-te koin, a vau zawng ni loin fimkhur turin a hrilh. Bàntir rum rum duh ila party an din aṭangin hma kan la ang. Tuna hetiang thil ti lo thei loa min siamtu chu amah a ni," a ti.

August 8, 2020 Vanglaini chhuakah Lalduhoma'n MLA aṭanga bàn theih a nih lohzia a sawi thu tarlan a ni tih sawiin MLP Secretary chuan, "Zoram mipui zahlohna leh dan palzût a hreh lohzia lannaah ngaih loh theih a ni lo a, dan vawnhim duhtu zawng zawngte min khei zawk vek a ni. Dante kan zir chiang ve a, dan a kalh ngeiin kan hria. Ram rorelnaah hian dan hi la ber se tih hi kan duh dan a ni," a ti a; Lalduhoma chu ZPM anga a chêt nasat bik avangin amah chauh bàn tura ngen an nih thu a sawi.

Lunglei East bialtu MLA Lawmawm Tochhawng chuan, an thil tih chu hrehawm an ti niin a sawi a, "Tih ngai lo se kan ti a, mahse, tih loh theih a ni si lo. Ram rorelna zahawmna atan leh ram rorelna kal zel tura dan a lal ber zel theihna atan ti kan ni," a ti.

Lawmawma chuan, August 15, 2017-ah pawl pathumin an páwl ṭhiat kher loa inremna an ziah hnuah Ṭangrual Pawl tiin Lalduhoma te chuan inthlan an chuh thu sawiin, "ZPM chu party ni loin movement an ni a, unit nuaibo tumna pawh a ri nasa. Indepenent anga ding ni mah se, ZPM anga an thawhho chhung kha chuan dan an kalh lo," a ti a; ZPM chu kum 2019-ah party anga an awm avangin ZPM MLA-te pawh ZPM anga an awm zui a rem loh avangin Zo Peoples Movement tia hming thlak a nih thu a sawi. 

ZPM party-ah chuan MPC tel loin, ZNP ṭhenkhat pawh an tel zui tawh loh thu sawiin Lawmawma chuan, "Pu Lalduhoma hi ZPM thil tihah a phusa ber berah aṭang a, independent nihna a hloh. Dan rorelna dik taka a kal theihna atan Speaker hnenah bàn tura ngenna kan thlen ta a ni," a ti.

Lunglei North bialtu MLA Dr Vanlalṭanpuia chuan, an thil tih chu dan hmanga inbeihna a nih thu sawiin, "Mimal emaw, politics-a kha taka inbeihna a ni lo. Kan CM emaw, MLA-te pawh dan hnuaia léng kan ni. Legislator-te chuan dan humhim hi kan mawphurhna a ni. Dan kan ngai pawimawh. Ngati nge an MLA-pui an beih tâk tihte a awm. Kan complaint thehluh ang hi legislator-te chauh thehluh theih a ni," a ti a; dan tlawhchhan fel tak neia complaint an thehluh avangin an chak ngei a rin thu a sawi.

Dr Vanlalṭanpuia sawi danin, Supreme Court-in political party zawm leh zawm loh chi hnihin a thliar a, pakhat chu fee pek leh inlawm luh a ni a, pakhat dang chu fee pe lo mah se, thil tih leh chêt dan aṭangin a lang chiang tih a ni.

Lawngtlai East bialtu MLA H Biakzauva chuan, "Pu Duhoma hi fimkhur turin duhsak taka hrilh a ni ṭhin a, a ngai pawimawh duh lo a, ZPM-ah activity a nei chhunzawm zel. Bàn theih a nih lohziate a sawi zawk a, Zoram mipui zah lohna leh dan palzamnaah kan ngai," a ti a, Lalduhoma'n independent MLA-te tih loh tur a ti chhunzawm zel niin a sawi.

MNF MLA-te chuan, Lalduhoma chu MP a nih laia dan an siam, dan pawisa loa chu dan hmanga bàn a nih tawh thu sawiin, "Hengte nena kan chhuizawn hian, Zoram mipui mithmuhah dan siamtu kan nih angin dan siamtute berin dan kan palzût fo chuan a dik thei lo a ni tih ngaihdan fel tak nei chunga tihmâkmawha ngaiin, hreh tak chungin ṭhangthar awm zel turte hmakhaw ngai chung leh dan lalna ram kan nih zel beiseiin hma kan la a ni," an ti.

•    Bank chi hrang 26 a awm.

•    Bank 26-te'n branch 210 an nei.

        i) Public sector bank branch - 81

        ii) Private sector bank branch - 24

        iii) Regional rural bank branch - 86

        iv) Cooperative bank branch - 19

•    Bank 26-a dawn ( deposit) zat - vbc. 13,469.91

•    Bank-te pek chhuah (advances) - vbc. 4,996.15

•    CD ratio - 37.09%

•    Priority sector advances - vbc. 271.40

•    Agriculture atana pek chhuah - vbc. 19.51

•    MSME (industry & business) atana pek - vbc. 185.73