Covid-19: Mizoram dinhmun ZMC-ah hri vei hmuh belh lo
October 7, Nilaini khan Mizoramah Covid-19 vei mi pahnih hmuh chhuah a ni a, hnam dang mipa ve ve an ni. ZMC laboratory-ah hripui vei hmuh belh a ni lo. Nimin khan hripui vei tawh lo mi pasarih chhuahtir an ni.
Niainia Covid-19 positive hmuh chhuah tharte chu Saitual Hospital TrueNAT laboratory-a hmuh chhuah leh Rapid Antigen Test (RAT) hmanga hmuh chhuah pakhat ve ve an ni. Saituala hmuh chhuah chu Silchar lam mi, kum 29-a upa a ni a, RAT hmanga hmuh chhuah chu Aizawla Assam Rifles sipai kum 50 mi a ni. Quarantine facility-a awm lai an ni a, Covid-19 symptom an nei lo.
October 7 khan ZMC laboratory-ah mi 216-te swab sample endik a ni a, Covid-19 vei an awm lo. TrueNAT-PCR hmangin district pariatah sample 75 leh RAT hmangin district pasarihah sample 588 endik a ni bawk a; Nilainia endik zawng zawng chu sample 879 a ni.
Nimin khan mi pasarih chhuahtir an ni a; SRH-ZMC leh Lunglei Sazaikawn CCC aṭangin mi pathum ve ve leh Chhiahtlang CCC aṭangin mi pakhat an chhuak.
Mizorama Covid-19 positive hmuh chhuah tawh chu mi 2,150 an ni a, mipa 1,778 leh hmeichhia 372 an ni. SRH-ZMC Bulletin tarlan danin, hripui vei hmuh tawh mi 2,150 zinga 1,927 (89.63%) chu an fihlim tawh avangin an chhuak tawh a, enkawl mek mi 223 (10.37%) an la awm. Enkawl mek zingah Covid-19 negative tawh an awm nual bawk nia thu dawn a ni.