Kum 2022-23 thlengin RTI Act hmangin zawhna 27,122 lut tawh

Mizoram Information Commission (MIC) chhinchhiah danin, kum 2022-23 chhung khan sorkar department hrang hrang hnuaia office/board 170 chuan Right to Information Act, 2005 tlawhchhanin zawhna 6,733 an dawng. Kum 2006-07 aṭanga a taka RTI Act kalpui a nih aṭangin 2022-23 thlengin zawhna 27,122 a lut tawh.

RTI Act, 2005 hi Mizoramah a takin kum 2006-07 aṭangin hman a nia, hman a nih aṭanga 2022-23 thlengin zawhna 27,122 a lut tawh. Chhannaa lungawi loh vangin first appeal 352 leh second appeal 107 a lut tawh a, MIC-ah complaint 147 a lut tawh bawk.

Thu dawn danin, MIC hian RTI Act, 2005 hnuaia Section 25-in a phût angin kum tin report a buatsaih ṭhin a, final report hnuhnung ber chu 2022-23 a ni. Tunah hian financial year 2023-24 chhunga report lâk khawm mek a ni a, June 15, 2024 chu sorkar department hrang hrang hnuaia office/board-te report thehluh hun hnuhnung a ni.

Kum 2022-23 chhung khan Mizoram sorkar department hnuaia office/board 170 chuan RTI Act tlawhchhana zawhna 6,733 an dawng a, zawhna luh tam ber kum a ni. Zawhna 6,733 zinga 6,430 (95.50%) chu state public information officer (SPIO)-te'n an chháng.

Land Revenue & Settlement directorate-in kum 2022-23 chhungin RTI Act tlawhchhana zawhna dawng tam berin, zawhna 1,589 an dawng a, RTI Act tlawhchhana zawhna lut zawng zawng 6,733 aṭangin 23.60% a tling. LRS directorate hian zawhna an dawnte hi chhang vek mah se, chhanna a lungawi loh vangin first appeal 10 an dawng bawk.