Assembly session koh a hautak a, common platform-a sawiho kan duh - Lalduhoma

ZPM Legislature Party (ZLP) leader Lalduhoma, chief minister chuan, Assembly session koh chu thil hautak a nih avangin Special Assistance to States for Capital Investment (SASCI) sum sorkar laipuia kîr (lapse) leh chungchang chu common platform-a sawiho duh an nih thu a sawi.

May 12, Pathianni zan khan Vanglaini palai zawhna chhangin Lalduhoma chuan, MNF Legislature Party-te'n common platform aia special assembly session-a SASCI sum sawiho zawk an rawt chungchang chu party-in an la sawiho hman loh thu a sawi a, "Assembly session koh hi thil hautak tak a ni. Sum leh pai ṭhahnem tak a ngaih bakah, official hrang hrangte an buai phah hle ṭhin," a ti.

ZLP Leader chuan, an dinnaah an chian thu sawiin, "SASCI sum hi MNF hun lai kum 2022-23 khan cheng vbc. 200 a lapse a, chumi hnuah 2023-24-ah an chêt muan avangin hna thawh tur 75% an thawk hman lo a, chuvang chuan second instalment cheng vbc. 233.36 a lapse leh," a ti a; sum lapse chungchang a sawite chu document awm vek a nih thu a sawi.

ZPM party chuan SASCI sum lapse chung­chang chu sawiho an châk tak zet tih sawiin Lalduhoma chuan, "Mipui hmaah ngei sawiho kan duh. Keini chu kan dinnaah kan chiang. Special assembly session ko kher lo hian sawiho theih tho a ni. Chu bakah, session koh an duh hun chhung May 2024 hi Model Code of Conduct-in a la huam avangin session koh chi a ni lo hrim hrim," a ti.

Tarlan tawh angin, ZPM Legislature Party chuan May 10, 2024 khan MNF Legislature Party (MLP) hnenah lehkha thawnin, SASCI sum lapse chungchang chu common platform-ah media hmaa sawipuiah an sáwm.

MLP chuan ziak vêkin May 11, 2024 khan an chháng a, special assem­bly session-a sawiho an duh thu an hriattir a ni.