Cyber police-in mi 11 man tawh

Mizoram Police-a CID (Crime) hnuaia Cyber Crime Police Station chuan kumin chhungin internet hmansual kaihhnawihah mi 11 an man tawh.

Cyber Crime PS hian kumin chhungin thubuai 21 an ziak lut tawh a, chu'ng thubuai kaihhnawihah chuan mi 11 an man. Thubuai an ziah luh tam ber chu sum kaihhnawiha inbumna a ni a, a dawttu chu hursualna kaihhnawiha inbumna a ni.

Thubuai an ziah luh dangte chu - mi nihna rûksaka pawikhawihna atana hman te, a neitu/siam chhuaktu phalna la hmasa loa video thehdarh thubuai te, hacking leh thubuai dangte a ni.

Cyber Crime PS hian kum 2020 aṭanga kumin May 7 thlenga thubuai an ziah luh zawng zawng chu 288 a ni a; chu'ng thubuai hrang hrangah chuan mi 40 man tawhin, chu'ng zinga mi 32 chu thiam loh chantir an ni tawh.

May 7, 2024 thlenga pawisaa inbumna thubuai an buaipuia sum an hmuh lêt chu cheng vbc. 1.14 a ni.